Nico Williams ដៃគូល្អជាមួយនឹង Lamine Yamal នៅជម្រើសជាតិអេស្ប៉ាញ ចង់បន្ត និងបង្កើតប្រវត្តិសាស្រ្តនៅក្លិបកំណើត Athletic Bilbao ដោយច្រានចោលសំណើពីសំណាក់ក្លិប Barcelona។ ដោយមានការជំរុញបន្ថែមពីក្រុមគ្រួសារ និងមានបងប្រុសជាប្រធានក្រុម Bilbao ផងជាមូលហេតុអន្ទងចិត្ត Williams ឱ្យបន្តកិច្ចសន្យាជាមួយក្លិបរហូតដល់ ឆ្នាំ២០៣៥។
Barcelona ជាក្លិបមួយបានព្យាយាមទិញយក Nico William តាំងពី១ឆ្នាំ មុនមកម្ល៉េះ ហើយនៅទីផ្សារដោះដូរកាលពីខែមុន ក្លិបរហស្សនាមអ្នកមានបុណ្យបានត្រៀមប្រាក់ប្រមាណ ៥៨លានអឺរ៉ូ (៦៧លានដុល្លារ) សម្រាប់ខ្សែបម្រើស្លាបអន្តរជាតិអេស្ប៉ាញរូបនេះ។
ទោះយ៉ាងណា ដើម្បីបញ្ចប់រឿងរ៉ាវចចាមអារ៉ាមនៃការផ្ទេរជាមួយនឹងក្លិប Barca កីឡាករវ័យ២៣ឆ្នាំ ពេលថ្មីៗនេះ បានចុះកិច្ចសន្យាបន្ថែមជាមួយនឹង Athletic Bilbao ដល់ឆ្នាំ២០៣៥។
ក្រោយពីសម្រេចចិត្តចង់បង្កើតប្រវត្តិសាស្រ្ត នៅក្លិបដើមកំណើតតាំងពីអាយុ ១១ឆ្នាំ មក Williams បានបកស្រាយពីឆន្ទៈដូច្នេះថា៖«ខ្ញុំមានអារម្មណ៍ថា យើងមានពេលវេលាច្រើនរដូវកាលថែមទៀត និងមានមហិច្ឆតាខ្លាំងក្នុងការប្រជែងពានរង្វាន់ដូចជា UEFA Champions League ដែលមនុស្សគ្រប់គ្នាចង់បាន។ រឿងនេះធ្វើឱ្យខ្ញុំចង់សម្រេចឱ្យបានជាមួយនឹងក្លិបដែលជាក្លិបកំណើតរបស់ខ្ញុំ។ ខ្ញុំចង់បន្តបង្កើតប្រវត្តិសាស្ត្រនៅទីនេះ ជាមួយក្រុមគ្រួសារ និងក្រុមដោយភាពរីករាយ។»។
ទីក្រុង Bilbao ប្រទេសអេស្ប៉ាញទៀតសោត ជាទីកន្លែងដែលក្រុមគ្រួសាររបស់ Nico Williams រស់នៅអស់រយៈពេលជាយូរមកហើយ។
រំឭកទៅកាលព្រឹត្តិការណ៍ Euro 2024 កីឡាករវ័យ ២៣ឆ្នាំ បានរួមចំណែកយ៉ាងសំខាន់ និងក្លាយជាកីឡាករខ្សែប្រយុទ្ធគួរឱ្យចាប់អារម្មណ៍បំផុត និងជាដៃគូដ៏ល្អជាមួយនឹងយុវជន Lamine Yamal វ័យ ១៨ឆ្នាំ។ ក្លិបធំៗមាន Bayern Munich, Arsenal និង Chelsea ជាដើមធ្លាប់ព្យាយាមចង់បាន Nico Williams ទៅរួមក្រុម។
Nico Williams ចូលរួមក្លិប Athletic Bilbao តាំងតែអាយុ ១១ឆ្នាំ ដោយបានលេងជាមួយបងប្រុសបង្កើតរបស់គេឈ្មោះ Inaki Williams ដែលជាសមាជិកជម្រើសជាតិហ្គាណា ហើយនឹងក្លាយជាប្រធានក្រុម Bilbao នៅរដូវកាលក្រោយទៅ។ កីឡាករវ័យ ២៣ឆ្នាំ បានចាត់ទុកបងប្រុសខ្លួនជានិមិត្តរូបដ៏ល្អមួយរូប ស្ថិតក្នុងក្រុម ហើយតែងតែមានភាពជាអ្នកដឹកនាំ ជំរុញស្មារតីក្រុមឱ្យប្រកួតប្រជែងកាន់តែខ្លាំង។
ដោយឡែកបើតាមការបញ្ជាក់របស់លោក Mikel Gonzalez ប្រធានផ្នែកកីឡារបស់ក្លិប Bilbao បានបញ្ជាក់បន្ថែមថា កត្តាគ្រួសារជារឿងសំខាន់បំផុតសម្រាប់ Williams និងសម្រាប់បងប្រុសរបស់គេ ដែលបានជួយរួមចំណែកយ៉ាងសំខាន់ក្នុងការបន្តដំណើររបស់កីឡាករវ័យ ២៣ឆ្នាំ ជាមួយនឹងក្លិប៕
