លោក Guardiola បានបង្ហាញជំនឿចិត្តថានឹងអាចកែប្រែក្រុមកីឡាករដែលមានក្នុងដៃនាពេលបច្ចុប្បន្នឱ្យក្លាយជាក្រុមដែលខ្លាំងមួយឡើងវិញ ទោះដឹងថាក្រុមកំពុងតែជួបបញ្ហាធំនៃទម្រង់លេង ក្រោយកីឡាករសំខាន់អវត្តមានព្រោះតែរបួស។
សប្តាហ៍មុន នៅក្នុងជំនួបពានរង្វាន់ Premier League របស់ប្រទេសអង់គ្លេស ជើងខ្លាំងដែលឈ្នះជើងឯក ៤រដូវកាល ជាប់គ្នា និងគ្មានក្រុមណាធ្វើបានពីមុនមកនេះ បានរងបរាជ័យយ៉ាងអាម៉ាស់នៅក្នុងទឹកដីកីឡដ្ឋាន Etihad ដែលជាផ្ទះរបស់ខ្លួនឯង។ ជាការចាញ់លើកទី៥ លទ្ធផលនោះបានធ្វើឱ្យក្លាយជាកំណត់ត្រាដ៏អាក្រក់បំផុតមិនធ្លាប់មាននៅក្នុងក្រុម Man City ចាប់តាំងពីក្រុមបានស្ថិតក្រោមការដឹកនាំរបស់អ្នកចាត់ការអេស្ប៉ាញរយៈពេល ៩ឆ្នាំ រួចមក។
មូលហេតុបង្កឱ្យក្រុមធ្លាក់មកដល់ចំណុចអាក្រក់បែបនេះ ក៏ព្រោះតែកីឡាករសំខាន់ៗមួយចំនួនរួមមាន ម្ចាស់ពាន Ballon d’Or ឆ្នាំ ២០២៤ Rodri, ខ្សែបម្រើ Mateo Kovacic និងខ្សែការពារ Roben Dias សុទ្ធសឹងតែស្ថិតក្នុងបញ្ជីកីឡាកររបួស ខណៈ Kevin de Bruyne ក៏មិនទាន់មានទម្រង់លេងពេញលេញឡើងវិញនៅឡើយ។ បន្ទាប់ពីក្រុមឆ្លងកាត់ទុក្ខលំបាក និងមិនទាន់រកឃើញជ័យជម្នះឡើងវិញ បុរសសញ្ជាតិអេស្ប៉ាញវ័យ ៥៣ឆ្នាំ និយាយថាទំនួលខុសត្រូវធំពេលនេះគឺ ត្រូវនាំក្រុមទៅកាន់ភាពខ្លាំងឡើងវិញ។
លោក Guardiola បាននិយាយប្រាប់អ្នកកាសែតអំឡុងសន្និសីទកាសែតត្រៀមការប្រកួតពានរង្វាន់ UEFA Champions League ទល់នឹងក្រុម Feyenoord ដូច្នេះថា៖«យើងមិនបានរំពឹងថានឹងចាញ់នោះទេ រឿងនេះសំខាន់សម្រាប់កីឡាករសឹងតែគ្រប់គ្នា ប៉ុន្តែវាបានកើតឡើងទៅហើយ ដូច្នេះអ្នកត្រូវស្វែងរកវិធីសាស្ត្រថ្មីដើម្បីដោះស្រាយចំពោះបញ្ហានោះ។ នៅពេលយើងចាប់ផ្តើមចាញ់ ខ្ញុំបានប្រាប់មនុស្សគ្រប់គ្នាថាខ្ញុំត្រូវស្វែងរកវិធីសាស្ត្រថ្មីដោះស្រាយ ខ្ញុំត្រូវតែធ្វើវា យើងត្រូវរកផ្លូវដើម្បីឈ្នះ វាជាភារកិច្ច និងទំនួលខុសត្រូវរបស់ខ្ញុំ គឺការស្វែងរកយុទ្ធសាស្ត្រដើម្បីឱ្យការប្រកួតរបស់យើងវិលត្រឡប់មកល្អឡើងវិញ ហើយយើងនឹងឈ្នះឡើងវិញដូចគ្នា។»។
ខណៈទីផ្សារដោះដូរកីឡាករពាក់កណ្តាលរដូវកាលខិតជិតមកដល់ អ្នកចាត់ការវ័យ ៥៣ឆ្នាំ ក៏បានឆ្លើយតបទៅនឹងសំណួររបស់អ្នកកាសែតថា លោកនៅតែជឿជាក់លើកីឡាករដែលមានក្នុងដៃពេលបច្ចុប្បន្ន ជាជាងបន្តនាំចូល និងត្រូវការពេលបង្វឹកបន្ថែមនោះឡើយ។
គួររំលឹកថា បន្ទាប់ពីក្រុម Man City ប្រកួតប្រជែងទល់នឹងក្រុម Feyenoord នៅជំនួបពានរង្វាន់ UEFA Champions League រួច នៅថ្ងៃទី២៧ ខែវិច្ឆិកា ពួកគេនឹងមានភារកិច្ចធំប្រកួតប្រជែងទល់នឹងក្រុមជើងខ្លាំង Liverpool ដែលកំពុងតែនាំនៅកំពូលតារាង Premier League ជាមួយនឹងគម្លាតពិន្ទុដល់ទៅចំនួន ៨ពិន្ទុ នៅកីឡដ្ឋាន Anfield ថ្ងៃទី១ ខែធ្នូ៕
