ខ្សែការពារ Marcelo ធ្វើការអបអរគ្រាប់បាល់ស៊ុតបញ្ចូលទីដោយការលុតជង្គង់ម្ខាង ខណៈក្រុមអធិរាជស Real Madrid បានត្រឡប់មកកាន់ទីលាន ដែលខានជាន់អស់រយៈពេល ៣ ខែ ក្រោយត្រូវបានផ្អាកដោយសារវីរុសកូរ៉ូណា ហើយការវិលវិញនេះ ទទួលបានលទ្ធផលជាទីគាប់ចិត្ត ជាមួយនឹងជ័យជម្នះលើក្រុម Eibar ៣-១ ក្នុងការប្រកួតកាលពីថ្ងៃអាទិត្យ។
ការកត់សម្គាល់ក្នុងការប្រកួតនេះ គឺថា ក្រោយស៊ុតបញ្ចូលទីគ្រាប់ទី ៣ ឲ្យក្រុម Real នៅនាទីទី ៣៧ កីឡាករប្រេស៊ីល Marcelo បានទម្លាក់ជង្គង់ឆ្វេងរបស់ខ្លួនទៅលើដី ហើយក្ដាប់ដៃស្ដាំលើកទៅលើមេឃ ដែលមើលទៅហាក់សម្ដែងការគាំទ្រដល់ចលនាតវ៉ាឈ្មោះ «Black Lives Matter»។
ការឈ្នះរបស់ក្រុមអធិរាជសនេះ មិនត្រឹមតែកាត់បន្ថយពិន្ទុនាំមុខពី ៥ ពិន្ទុ មក ២ ពិន្ទុរបស់ក្រុមកំពូលតារាងអ្នកមានបុណ្យ Barcelona ដែលបំបាក់ក្រុម Real Mallorca ៤-០ ប៉ុណ្ណោះទេ ថែមទាំងបានបង្ហាញថា ការប្រជែងដណ្ដើមពានរង្វាន់ក្របខ័ណ្ឌ La Liga រដូវកាលនេះ នឹងមិនធ្លាក់ទៅលើក្រុមណាងាយៗឡើយ។
៣ គ្រាប់របស់ក្រុមម្ចាស់ផ្ទះ Real ធ្វើបានសម្រេចដោយកីឡាករ ៣ រូបផ្សេងគ្នា ខណៈគ្រាប់ដំបូង កើតឡើង ក្រោយការប្រកួតដំណើរការទៅត្រឹមតែ ៤ នាទីប៉ុណ្ណោះ ដោយការស៊ុតរបស់ខ្សែបម្រើសញ្ជាតិអាល្លឺម៉ង់ Toni Kroos ហើយគ្រាប់ទី ២ បានមកពីការប៉ែងបាល់ស្រួលៗរបស់ប្រធានក្រុម គឺខ្សែការពារ Sergio Ramos នៅនាទីទី ៣០ ដែលជាការបញ្ចូនបាល់ពីខ្សែបម្រើ Eden Hazard រីឯគ្រាប់ទី ៣ ជារបស់កីឡាករ Marcelo។ ១ គ្រាប់របស់ក្រុម Eibar ធ្វើបានសម្រេចដោយកីឡាករ Pedro Bigas នាទីទី ៦០។
គ្រូបង្វឹករបស់ Real លោក Zinedine Zidane សម្ដែងអារម្មណ៍រីករាយចំពោះការចាប់ផ្ដើមជាមួយនឹងលទ្ធផលវិជ្ជមាននេះ ជាពិសេសជាមួយបរិយាកាសប្លែកទាំងការគ្មានអ្នកគាំទ្រចូល និងការមកលេងនៅទីលានថ្មី។ ក្រុមអធិរាជស នឹងលេងការប្រកួតក្នុងទឹកដីដែលនៅសល់នាកីឡដ្ឋាន lfredo di Stefano ជំនួសឲ្យកីឡដ្ឋាន Santiago Bernabeu ដែលកំពុងត្រូវបានជួសជុលកែលម្អនៅរដូវក្ដៅនេះ។
គ្រូបង្វឹកសញ្ជាតិបារាំងរូបនេះបាននិយាយថា៖ «យើងដឹងថា ស្ថានភាពពេលនេះ រាងប្លែកបន្តិច ប៉ុន្តែកីឡាករទាំងអស់ គឺជាកីឡាករអាជីព ដូច្នេះយើងត្រូវតែដឹងនូវបញ្ហាប្រឈមទាំងនេះ ហើយយើងត្រូវតែសម្របខ្លួនជាមួយនឹងស្ថានការណ៍បែបនេះឲ្យបាន»។
ពាក់ព័ន្ធនឹងការប្រកួតលោក Zidane វ័យ ៤៧ ឆ្នាំ បានឲ្យដឹងថា៖ «យើងចាប់ផ្ដើមបានល្អ នៅវគ្គទី ១ តែតង់ទី ២ ហាក់ដូចជាមិនសូវប្រសើរឡើយ។ ខ្ញុំមិនគិតថា កីឡាកររបស់យើងមានការខ្សោយរាងកាយឡើយ ព្រោះពួកយើងត្រៀមខ្លួនបានយ៉ាងល្អ។ វាមានបញ្ហាតិចតួចប៉ុណ្ណោះ។ តែមិនអីទេ យើងគ្របសង្កត់វគ្គដំបូង នេះជារឿងសំខាន់ក្នុងការយកជ័យជម្នះ»៕
