ក្រុមហង្សក្រហម Liverpool ក្រោយពីយកឈ្នះក្រុម Crystal Palace បានក្នុងលទ្ធផល ៤-០ នៅយប់មិញមក ពេលនេះពួកគេត្រូវការតែ២ពិន្ទុទៀតប៉ុណ្ណោះដើម្បីលើកពាន Premier League ។
ដោយសារតែត្រូវការត្រឹម២ពិន្ទុ នឹងអាចលើកពានPremier League ជាថ្មីក្នុងរយៈពេល៣០ឆ្នាំនេះហើយ ទើបបានជាខ្សែប្រយុទ្ធ Salah បង្ហាញអារម្មណ៍ថា៖ “វាល្មមដល់ពេលយើងលើកពានហើយ។ ២ពិន្ទុទៀត ដើម្បីឈ្នះពាន គឺជារឿងអស្ចារ្យខ្លាំងណាស់។ តាំងពីខ្ញុំមកទីនេះ ខ្ញុំបានតាំងចិត្តថានឹងជួយក្រុមឈ្នះពាន។ ក្រុងនេះខានឈ្នះពានយូរមកហើយ។ ឆ្នាំមុនយើងមានឱកាសឈ្នះដែរ តែ Man City ធ្វើបានល្អជាង ពួកគេសមនឹងទទួលយក។ នេះជាពេលយើងឈ្នះពានម្ដងហើយ”។
ក្រុម Liverpool លើកពានចុងក្រោយបំផុតនៅឆ្នាំ១៩៩០ ដោយកាលនោះលោក Sir Kenny Dalglish ជាអ្នកដឹកនាំក្រុម។ ៣០ឆ្នាំបន្ទាប់មកទៀតនេះ ក្រុម Liverpool មិនអាចលើកពានបានទៀតទេ ដោយបានត្រឹមតែកៀកៗប៉ុណ្ណោះ។ តែសម្រាប់ឆ្នាំនេះវិញ ពួកគេ១០០% ដឹងតែស្គាល់រសជាតិ Premier League ឡើងវិញហើយ៕
