Messi លាអ្នកគាំទ្រក្នុងការបង្ហាញខ្លួនចុងក្រោយក្នុងដីអាហ្សង់ទីន និងសន្យាជួបគ្នានៅ World Cup 2026

កំពូលកីឡាករ Lionel Messi បង្ហាញខ្លួនឱ្យក្រុមជម្រើសជាតិអាហ្សង់ទីនក្នុងដីជាលើកចុងក្រោយ ដោយជួយក្រុមឈ្នះវ៉េណេស៊ុយអេឡា ៣​-០ ក្នុងការប្រកួតវគ្គជម្រុះ World Cup 2026 ទ្វីបអាម៉េរិកខាងត្បូង(CONMEBOL) ថ្ងៃទី៥ កញ្ញា។ Messi ដែលរកបាន ២ គ្រាប់ ក្នុងកីឡដ្ឋាន Monumental ទីក្រុង ​Buenos Aires លាអ្នកគាំទ្រ និងសន្យាជួបគ្នាម្តងទៀតនៅ World Cup 2026។

៣គ្រាប់របស់អាហ្សង់ទីន សម្រេចបានដោយប្រធានក្រុមវ័យ ៣៨ឆ្នាំ នៅនាទី៣៩ និង ៨០ និង ១គ្រាប់ ពីសំណាក់ Lautaro Martinez នៅនាទី៧៦។ ស៊ុតបញ្ចូលទី ២គ្រាប់ ប្រៀបបានជាកាដូរបស់ Messi ផ្ញើជូនអ្នកគាំទ្រ សម្រាប់ការប្រកួតចុងក្រោយបង្អស់របស់គេជាមួយជម្រើសជាតិលើទឹកដីអាហ្សង់ទីន។

ចប់ការប្រកួតភ្លាម សំណួរជាច្រើនបានសួរទៅកីឡាករមកពីក្រុម Inter Miami តើគេនឹងបង្ហាញខ្លួននៅព្រឹត្តិការណ៍ World Cup 2026 ឬទេ? Messi តបខ្លី «យើងនឹងរង់ចាំមើលរឿងនេះ​»។ ការប្រកួតពានរង្វាន់ World Cup 2026 ដែលធ្វើនៅអាម៉េរិក កាណាដា និងម៉ិកស៊ិក មានក្រុមចូលរួមសរុប ៤៨ លើកដំបូង ហើយ Messi ទំនងបង្ហាញខ្លួនប្រកួតលើកចុងក្រោយដូចគ្នា។​​

ក្រោយឈ្នះវ៉េណេស៊ុយអេឡា ខ្សែប្រយុទ្ធម្ចាស់ពាន World Cup 2022 បាននិយាយបង្ហាញ ការអរគុណ និងអារម្មណ៍ល្អរបស់គេទៅអ្នកគាំទ្រ ដូច្នេះថា៖«ខ្ញុំទទួលបានអារម្មណ៍ពិសេសៗជាច្រើន ដែលខ្ញុំធ្លាប់ទទួលបានបទពិសោធន៍ពីរឿងរ៉ាវជាច្រើនទាំងនេះលើទីលាន។ ខ្ញុំតែងមានអារម្មណ៍ល្អ ក្នុងការលេងឱ្យជម្រើសជាតិអាហ្សង់ទីន និងពលរដ្ឋយើងគ្រប់គ្នា ហើយយើងពិតជារីករាយខ្លាំងចំពោះការប្រកួតជាច្រើនឆ្នាំមកនេះ។ ខ្ញុំពិតជាសប្បាយចិត្ត ដែលអាចបញ្ចប់ក្នុងពេលនេះ ជាអ្វីខ្ញុំតែងតែស្រម៉ៃ។[…]»។

អតីតកីឡាករ Barcelona និង PSG ជាកីឡាករម្នាក់រកគ្រាប់បាល់ច្រើនជាងគេប្រចាំក្រុមជម្រើសជាតិអាសហ្សង់ទីន ចំនួន ១១៤គ្រាប់ ហើយគេបង្ហាញខ្លួនលេងលើកដំបូងនៅឆ្នាំ ២០០៦ ក្នុងវ័យ ១៨ឆ្នាំ។ ​Messi ជួយអាហ្សង់ទីន ឈ្នះពាន World Cup 2022 និងឈ្នះពានរង្វាន់ Copa America ២លើក។ អាហ្សង់ទីន នឹងមានការប្រកួតចុងក្រោយវគ្គជម្រុះ ​World Cup 2026 ទល់ អេក្វាទ័រ នៅថ្ងៃទី៩ កញ្ញា។

ដោយឡែកការប្រកួតវគ្គជម្រុះ World Cup 2026 ទ្វីបអាម៉េរិកខាងត្បូង រកឃើញក្រុមចំនួន ៣ បន្ថែមទៀតរួមមាន អ៊ុយរូហ្គាយ កូឡុំប៊ី និងប៉ារ៉ាហ្គាយ បានកក់កៅអីស្វ័យប្រវត្តិទៅកាន់ព្រឹត្តិការណ៍ World Cup 2026 នៅអាម៉េរិក កាណាដា និងម៉ិកស៊ិក បន្ទាប់ពី អាហ្សង់ទីន ប្រេស៊ីល និងអេក្វាទ័រ បានកក់កៅអីមុនគេ។

វ៉េណេស៊ុយអេឡាដែលចាញ់អាហ្សង់ទីន ឈរនៅលេខ ៧ ក្នុងតារាងវគ្គជម្រុះ ដោយរកបាន ១៨ពិន្ទុ ខណៈដេញតាមប្រជែងដោយបូលីវី នៅលេខ ៨ មាន ១៧ពិន្ទុ។ វ៉េណេស៊ុយអេឡា និងបូលីវី ត្រូវ ដណ្តើមកន្លះកៅអីទ្វីបអាម៉េរិកខាងត្បូង ដើម្បីមានឱកាសទៅប្រកួតដណ្តើមកន្លះកៅអីបន្ថែមទៀតពីការប្រកួតជម្រុះអន្តរទ្វីបទល់នឹងក្រុមឈ្នះកន្លះកៅអីមកពីទ្វីបផ្សេងទៀត។

ស៊ីលី លេខ ១០ និងប៉េរូ លេខ ៩ ធ្លាប់ជាក្រុមខ្លាំងក្នុងទ្វីបអាម៉េរិកខាងត្បូង បានខកខានឱកាសបង្ហាញខ្លួននៅ World Cup 2026 ដោយក្រុមឈរនៅកម្រិតបាតតារាងវគ្គជម្រុះ៕