កិច្ចសន្យារវាងតារាបាល់ទាត់ព័រទុយហ្កាល់ ជាមួយក្លិបក្នុងលីគ អារ៉ាប៊ីសាអូឌីត នឹងផុតនៅត្រឹមថ្ងៃទី៣០ ខែមិថុនា។ Ronaldo ទើបជួយជម្រើសជាតិព័រទុយហ្កាល់ ដណ្តើមបានពានរង្វាន់ UEFA Nations League កាលពីថ្ងៃទី៨ មិថុនា ដោយយកឈ្នះការប្រកួតទល់នឹងអេស្ប៉ាញ។ ក្រោយឈ្នះពាន កីឡាករវ័យ៤០ឆ្នាំ បានចេញមុខអះអាងអំពីរឿងអនាគតរបស់គេ ថានឹងបន្តនៅក្លិប Al Nassr ដដែលគ្មានការផ្លាស់ប្តូរក្លិបឡើយ ឆ្លើយតបទៅនឹងសំណួររបស់ក្រុមអ្នកកាសែត។
កន្លងទៅ អតីតខ្សែប្រយុទ្ធក្លិប Real Madrid, Manchester United ធ្លាប់ទទួលបានសំណើផ្ទេរជាច្រើន ពីសំណាក់ក្លិបធំៗនៅអារ៉ាប៊ីសាអូឌីត និងក្លិបមួយចំនួនពីប្រេស៊ីល ដែល សុទ្ធសឹងជាក្លិប មានកៅអីប្រកួត FIFA Club World Cup ឆ្នាំ២០២៥ នៅអាម៉េរិក។ ក្លិប Al Hilal កន្លងទៅ ត្រូវបានគេលើកយកមកនិយាយ ផ្សារភ្ជាប់ហូរហែទៅនឹងការផ្ទេរយក Ronaldo ទៅចូលរួមក្រុម បន្ទាប់ពីកិច្ចសន្យានៅក្លិប Al Nassr ហៀបផុតកំណត់។
លើសពីនេះ បន្ទាប់ពីការប្រកួតបិទបញ្ចប់រដូវកាលនៅក្នុងលីគកំពូល Saudi Pro League កីឡាករវ័យ៤០ឆ្នាំ ថែមទាំងធ្លាប់បង្ហោះសារបង្ហាញពីបំណង ចង់បញ្ចប់ទំនាក់ទំនងជាមួយក្លិប Al Nassr ហើយស្វែងរកក្លិបថ្មី ដើម្បីបន្តប្រកបអាជីពនៅវ័យចាស់របស់គេបន្តទៀត។
ចាប់តាំងពីចូលរួមក្លិប Al Nassr តាំងពីដើមឆ្នាំ២០២៣ ក្រោយផ្តាច់កិច្ចសន្យាជាមួយ Man Utd កីឡាករសញ្ជាតិអេស្ប៉ាញ រកបានគ្រាប់បាល់៩៩លើក ក្នុងការបង្ហាញខ្លួនចំនួន ១០៥ប្រកួត។ រដូវកាលនេះ កីឡាករវ័យ៤០ឆ្នាំ ក៏ក្លាយជាកីឡាករឈ្នះស្បែកជើងមាសប្រចាំលីគកំពូលអារ៉ាប៊ីសាអូឌីតដែរ ដោយរកបានគ្រាប់បាល់ចំនួន ២៥គ្រាប់ សម្រាប់ក្លិប Al Nassr។
យ៉ាងណា ប្រើពេលជាង ២ឆ្នាំ កន្លះរួចមក Ronaldo ពុំទាន់អាចដណ្តើមបានពានរង្វាន់ធំៗផ្លូវការណាមួយឡើយ សម្រាប់ក្លិប Al Nassr ខណៈរដូវកាលក្រោយ ក្លិបគ្មានកៅអីសម្រាប់ប្រកួតក្នុងពានរង្វាន់ AFC Champions League ថែមទៀត។
ខុសគ្នាស្រឡះ នៅជម្រើសជាតិព័រទុយហ្កាល់វិញ Ronaldo បន្តរីកមុខមាត់កាន់តែខ្លាំងឡើង ដោយគេអាចស៊ុតបាល់បញ្ចូលទី រហូតរកបានចំនួន ១៣៨គ្រាប់ មកដល់ពេលនេះ ហើយគ្រាប់ចុងក្រោយបង្អស់ដែលស៊ុតបាន គឺនៅក្នុងវគ្គផ្តាច់ព្រ័ត្រ UEFA Nations League ពេលថ្មីៗនេះ។ Ronaldo ជួយព័រទុយហ្កាល់ឈ្នះពានរង្វាន់ទី៣ ក្នុងប្រវត្តិសាស្ត្រ បន្ទាប់ពីឈ្នះ Euro 2016 និង Nations League 2019៕
© អត្ថបទដើម : thmeythmey.com
