កីឡាករ Jadon Sancho បានបង្ហាញទម្រង់លេងដ៏អស្ចារ្យនៅរដូវកាលនេះ បន្ទាប់ពីរកបាន២០គ្រាប់ និងបញ្ជូនបាល់ឲ្យដៃគូរបាន២០គ្រាប់ផងដែរនោះ។ ដោយសារតែទម្រង់លេងល្អបែបនេះហើយ បានជាក្លិបធំៗនៅអង់គ្លេសដូចជា Liverpool, Man Utd និង Chelsea កំពុងតែដណ្តើមគ្នាតាមទិញ។
ប៉ុន្តែក្លិបតោខៀវ Chelsea ហាក់ដូចជាទៅមិនរួចជាមួយនឹង Liverpool និង Man Utd នោះទេ ក៏ព្រោះតែក្លិបមិនមានលុយគ្រាប់គ្រាន់ ខណះពេលដែលជិតឈានដល់កិច្ចសន្យានាំយកកីឡាករ Timo Werner ពី Leipzig។
បើតាមសេចក្ដីរាយការណ៍បានលើកឡើងថា Liverpool ហាក់ដូចជាមានប្រៀបជាងគេក្នុងការនាំយកកីឡាករ Sancho មករួមក្រុម ព្រោះតែមានដំណឹងលេចឮថា Sadio Mane ចង់ចាកចេញពីក្រុមនៅរដូវក្ដៅនេះ។ Klopp ត្រូវការវត្តមាន Sancho ដើម្បីមកជំនួស Mane បើកីឡាករស្បែកខ្មៅរូបនេះនឹងចាកចេញមែននោះ។
គួររម្លឹកដែរថា Mbappe ធ្លាប់ជាកីឡាករទី១ដែលលោក Klopp តាមទិញនៅរដូវក្ដៅនេះ ប៉ុន្តែបន្ទាប់ពីទូរស័ព្ទទៅនិយាយជាមួយកីឡាកររូបនេះហើយមក គ្រូបង្វឹក Liverpool រូបនេះបានបង្វែរចំណាប់អារម្មណ៍មកលើកីឡាករ Sancho វិញម្តង។
ក្លិបហង្សក្រហម Liverpool ត្រូវបានគេរាយការណ៍មកថាបានត្រៀមលុយរួចរាល់ហើយក្នុងការទិញកីឡាករជម្រើសជាតិអង់គ្លេសរូបនេះមករួមក្រុម។
