ក្របខ័ណ្ឌ La Liga របស់ប្រទេសអេស្ប៉ាញបានឲ្យដឹងថា ខ្លួននឹងឈានដល់នីតិវិធីផ្លូវច្បាប់ពីបទឧក្រិដ្ឋចំពោះអ្នករត់ចូលទីលាន អំឡុងការប្រកួតរវាងក្រុមអ្នកមានបុណ្យ Barcelona (Barca) ទល់នឹង Real Mallorca កាលពីថ្ងៃសៅរ៍ចុងសប្ដាហ៍កន្លងទៅ ដែលទង្វើនោះគួរតែត្រូវជាប់ពន្ធនាគារ។
ហេតុការណ៍នោះ បានកើតមាននៅនាទីទី ៥២ ក្នុងការប្រកួត ដែលក្រុម Barca មានជ័យជម្នះ ៤-០ លើក្រុមម្ចាស់ផ្ទះ Mallorca នៅឯកីឡដ្ឋាន Son Moix បុរសម្នាក់ពាក់អាវក្រុមជម្រើសជាតិអាហ្សង់ទីន ដោយមានឈ្មោះកីឡាករ Lionel Messi នៅខាងក្រោយ បានរត់ចូលទីលាន ហើយបង្ហាញរូបថតមួយសន្លឹកនៅលើទូរស័ព្ទររបស់ខ្លួនឈរក្បែរខ្សែការពារ Jordi Alba។ អ្នកគាំទ្ររូបនោះ មិនពាក់ទាំងម៉ាស់ និងស្រោមដៃ ហើយត្រូវបានដេញតាម មុននឹងត្រូវចាប់ ហើយនាំចេញទៅ ដោយសន្តិសុខ។
ក្របខ័ណ្ឌ La Liga បានដាក់ចេញយ៉ាងតឹងរ៉ឹងនូវគោលការណ៍វេជ្ជសាស្រ្តសម្រាប់ការប្រកួត ដែលបានចាប់ផ្តើមឡើងវិញ ក្នុងលីកកំពូល កាលពីយប់ថ្ងៃព្រហស្បតិ៍ជាមួយនឹងជ័យជម្នះ ២-០ របស់ក្រុមម្ចាស់ផ្ទះ Sevilla លើក្រុម Real Betis ដោយមានមនុស្សមិនដល់ ៣០០ នាក់នោះទេ ដែលត្រូវបានអនុញ្ញាតឲ្យចូលទៅក្នុងកីឡដ្ឋាន ហើយការប្រកួត ត្រូវលេងដោយបិទទ្វារ។
សេចក្តីថ្លែងការណ៍មួយពីខាងលីកបានឲ្យដឹងថា៖ «La Liga នឹងធ្វើការប្ដឹងពីបទឧក្រិដ្ឋចំពោះអ្នក ដែលបានរត់ចូលទីលានដោយគ្មានការអនុញ្ញាត និងបានបំពានគោលការណ៍ ដែលបានបង្កើតឡើងក្នុងច្បាប់សុខភាពបច្ចុប្បន្ននេះ និងព្រមទាំងមិនគោរពតាមបទបញ្ជារបស់បុគ្គលិកសន្តិសុខឯកជន។ ទង្វើរបស់គេ បង្កើតនូវទោសឧក្រិដ្ឋ»។
សេចក្ដីប្រកាសនោះ បានបន្ថែមថា៖ «La Liga ចង់បង្ហាញការថ្កោលទោសដាច់ខាតរបស់ខ្លួនចំពោះអាកប្បកិរិយាបែបនេះ ដែលធ្វើឲ្យប៉ះពាល់ដល់សុខភាពអ្នកដទៃ និងភាពស្អាតស្អំនៃការប្រកួត»៕
