៣ ខែក្រោយគ្រាប់បាល់ចុងក្រោយយបង្អស់ ត្រូវបានទាត់នោះ ក្របខ័ណ្ឌ Premier League បានងើបចេញពីស្រមោលនៃជំងឺរាតត្បាតកូវីដ ១៩ នៅសប្តាហ៍នេះសម្រាប់អ្វីដែលគ្រប់គ្នា នឹងឃើញមានការលេងយ៉ាងមមាញឹកចំនួន ៩២ ការប្រកួត ឲ្យបានបញ្ចប់សព្វគ្រប់។
ដោយសារតែ វីរុសថ្មីនេះ នៅតែមានការគម្រាមកំហែងដល់អាយុជីវិតរបស់ប្រជាជន នៅចក្រភពអង់គ្លេសនៅឡើយ ដូច្នេះការវិលមកមានសកម្មភាពឡើងវិញរបស់ក្របខ័ណ្ឌ Premier League បើទោះជាលេងដោយបិទទ្វារក៏ដោយ វាក៏នឹងផ្ដល់នូវភាពរីករាយដែលគ្រប់គ្នាកំពុងចង់បាន សម្រាប់អ្នកគាំទ្របាល់ទាត់ដ៏ងប់ងុលទាំងឡាយផងដែរ។
គ្រប់ការប្រកួតនឹងត្រូវបានផ្សាយបន្តផ្ទាល់ ដោយភាគច្រើន គឺឥតបង់ប្រាក់ឡើយ ហើយការប្រកួតប្រជែងនោះ នឹងកើតមានយ៉ាងលឿនចាប់ពីថ្ងៃពុធតទៅ ជាមួយនឹងការប៉ះគ្នារវាងក្រុមម្ចាស់ផ្ទះមេឃខៀវ Manchester City និងក្រុមកាំភ្លើងធំ Arsenal ហើយក្រុមកំពុងតស៊ូដើម្បីរស់ Aston Villa ស្វាគមន៍ក្រុមប្រឹងប្រែងដណ្ដើមកៅអីទៅលេងក្របខ័ណ្ឌអឺរ៉ុប Sheffield United។ ប្រសិនបើគ្មានការកើនឡើងនៃការការឆ្លងវីរុសកូរ៉ូណាទេ រដូវនេះនឹងបញ្ចប់ទាំងស្រុង នៅថ្ងៃទី ២៦ ខែកក្កដា។
យ៉ាងណាមុននឹងរដូវកាលនៃលីកលំដាប់កំពូលរបស់ប្រទេសអង់គ្លេសនេះ ចាប់ផ្ដើមយុទ្ធនាការរបស់ខ្លួនឡើងវិញតាមការគ្រោងទុក មានរឿងរ៉ាវខ្លះៗ ដែលគួរឲ្យចាប់អារម្មណ៍ផងដែរ ដូចជាតំណែងជើងឯក ការប្រកួតដណ្ដើមចំណាត់ដើម្បីទៅលេងនៅតំបន់អឺរ៉ុប និងការប្រជែង ដើម្បីកុំឲ្យធ្លាក់ទៅលីកលំដាប់ទី ២។
និយាយពីក្រុមដែលស្ទើរតែក្លាយជាម្ចាស់ពានទៅហើយនោះ គ្មាននណារម្នាក់ហ៊ានប្រកែកថា មិនមែនក្រុម Liverpool ឡើយ បើទោះជាមុនអ្វីគ្រប់យ៉ាងត្រូវបានផ្អាក ក្រុមរបស់គ្រូបង្វឹកសញ្ជាតិអាល្លឺម៉ង់លោក Juergen Klopp ហាក់ដូចជាធ្លាក់ទម្រង់លេងបន្តិច ដោយការប្រកួតចាញ់ផ្ទួនៗ ក្នុង៣កម្មវិធីផ្សេងគ្នាក៏ដោយ ព្រោះមានពិន្ទុនាំមុខដាច់ដល់ទៅ ២៥ ពិន្ទុ ខណៈការប្រកួតនៅសល់តែ ៩ សប្ដាហ៍ប៉ុណ្ណោះ។
នៅក្របខ័ណ្ឌ Premier League ក្រុម Liverpool ដែលសង្ឃឹមថា ខ្លួននឹងអាចលើកពានមាស ដោយការលេងមិនចាញ់សោះ ក្នុង ១ រដូវកាល ត្រូវបានរលាយ ក្រោយបរាជ័យយ៉ាងអាម៉ាស់ក្រោមថ្វីជើងក្រុមម្ចាស់ផ្ទះ Watford ៣-០។ បន្ទាប់មកក៏ទៅចាញ់ក្រុមតោខៀវ Chelsea ២-០ ធ្លាក់ចេញពីកម្មវិធី FA Cup។ តែបរាជ័យទាំង២លើកនេះ អាចប្រហែលមិនធ្វើក្រុមហង្សក្រហមមានការសោកស្ដាយស្មើនឹងការធ្លាក់ចេញពីក្របខ័ណ្ឌ Champions League នោះទេ ក្រោយប្រកួត ទាំង ២ ជើង ចាញ់ Atletico Madrid ៣-២។
តែសង្គ្រាមដែលគួរឲ្យចាប់អារម្មណ៍ខ្លាំង គឺការដណ្ដើមតំណែងក្រុមកំពូលទាំង៤ (Top 4) ជាពិសេសសម្រាប់ក្រុមដែលទាញឱកាស ពេលក្រុម Manchester City ត្រូវជាប់បម្រាមមិនឲ្យចូលប្រកួតប្រជែងនៅតំបន់អឺរ៉ុប ប្រសិនក្រុមរបស់ Pep Guardiola បរាជ័យសម្រាប់បណ្ដឹងឧទ្ធរណ៍ ហើយក្រុមដែលកំពុងប្រទាញប្រទង់គ្នាខ្លាំង គឺ Chelsea លេខ៤ និង Manchester United លេខ ៥។
ទទួលបានការចាប់អារម្មណ៍មិនខុសគ្នាដែរ គឺការប្រកួតប្រជែង ដើម្បីរស់នៅលីកកំពូល ដ្បិតក្រុមចាប់ពីចំណាត់ថ្នាក់ទី១៥ ចុះក្រោម នៅមិនទាន់មានក្រុមណា ១ ដែលមានសុវត្ថិភាពនៅឡើយទេ ពោលគឺសុទ្ធតែអាចត្រូវបានកាត់ទម្លាក់ទៅលីកលំដាប់ទី ២ ដូចៗគ្នា។ ជាមួយគ្នានេះ សូម្បីក្រុម Norwich City ទោះពេលនេះ ឈរនៅបាតតារាង ក៏មានសង្ឃឹមបន្តជីវិតនៅ Premier League បានដែរ បើប្រកួតដែលនៅសល់ធ្វើបានលទ្ធផលល្អ ព្រោះថា តាមពីក្រោយក្រុមនៅទីសុវត្ថិភាពតែ ៦ពិន្ទុប៉ុណ្ណោះ៕
