MU ត្រូវបានក្រុម Leicester City យកឈ្នះក្នុងលទ្ធផល ៤-២ ក្នុងការប្រកួតក្របខ័ណ្ឌ Premier League កាលពីចុងសប្តាហ៍ ហើយវាគឺជាថ្ងៃដ៏លំបាកមួយសម្រាប់ Cristiano Ronaldo ខណៈដែលរូបគេត្រូវបានកីឡាករ Leicester City បិទជិត។
គ្រូបង្វឹកលោក Brendan Rodgers បានផ្តល់ការគោរពដល់ Ronaldo បន្ទាប់ពីការប្រកួតដោយសរសើរគាត់ថាជាគំរូសម្រាប់កីឡាករវ័យក្មេងទាំងអស់ដែលត្រូវធ្វើតាម ប៉ុន្តែបានបង្ហាញថា Leicester ត្រូវតែផ្តោតលើការបិទរាល់កីឡាករ MU ទាំងអស់ ជាជាងតែខ្សែប្រយុទ្ធព័រទុយហ្កាល់។
Leicester បានព្យាយាមបន្សាបអំណាចវាយលុករបស់ MU ដោយសមត្ថភាពរបស់ពួកគេក្នុងការបិទខ្សែបម្រើ ហើយ Rodgers ពេញចិត្តនឹងការបង្កើតការលេងដែលមានសម្ពាធ។
លោក Rodgers បាននិយាយថា៖ «កីឡាករជាខ្សែការពាររបស់អ្នកដឹងថាអ្នកត្រូវតែផ្តោតអារម្មណ៍ពេញមួយប្រកួត។ របៀបនៃការលេងរបស់ Cristiano បានផ្លាស់ប្តូរពីមួយឆ្នាំទៅមួយឆ្នាំពីអ្នកអូសបាល់ទៅជាអ្នករកគ្រាប់បាល់មិនគួរឱ្យជឿ ព្រោះភាគច្រើននៃគ្រាប់បាល់របស់គាត់គឺចេញពីតំបន់គ្រោះថ្នាក់»។
«អ្នកត្រូវតែព្រួយបារម្ភអំពីគាត់ជាងនេះ ព្រោះអ្នកបានឃើញ Bruno Fernandes ស៊ុតបាល់បញ្ចូលទីនៅពាក់កណ្តាលសប្តាហ៍ Cristiano បានស៊ុតបញ្ចូលទី Hat-trick តើ Mason (Greenwood) គួរឱ្យខ្លាចប៉ុណ្ណា ដែលមិននិយាយពី Jadon Sancho និង Marcus Rashford ក៏ជាប់ពាក់ព័ន្ធនឹងការវាយប្រហារជួរមុខដែរ»។
ពួកគេមានទេពកោសល្យដ៏ធំ អ្នកត្រូវតែធ្វើសមកាលកម្មតាមរបៀបដែលអ្នកដាក់សម្ពាធដើម្បីព្យាយាមបញ្ឈប់បាល់មករកពួកគេ។ អ្នកត្រូវតែផ្តោតអារម្មណ៍ឱ្យបានល្អហើយជាសំណាងដែលយើងធ្វើបានល្អ។
Ronaldo ទោះបីនៅស្ងៀមទល់នឹងក្រុម Leicester ប៉ុន្តែ Rodgers នៅតែមានការចាប់អារម្មណ៍ចំពោះគុណភាពរបស់គាត់៖ «គាត់គឺជាគំរូដ៏ល្អសម្រាប់កីឡាករទាំងអស់។ វាគឺជាការលើកទឹកចិត្តសម្រាប់កីឡាករគ្រប់រូបមិនថាក្មេងឬចាស់ របៀបថែរក្សាខ្លួនឯង របៀបលះបង់ខ្លួនឯង ដើម្បីអាជីពរបស់ខ្លួន ដើម្បីមានបំណងប្រាថ្នា មហិច្ឆតា និងឆន្ទៈចង់ឈ្នះ និងជោគជ័យ»៕
