អ្នកជំនាញម្នាក់ទៀតបានចេញមុខនិយាយអំពីអនាគតរបស់ខ្សែបម្រើ Jadon Sancho ក្នុងកំឡុងពេលដែលកីឡាកររូបនេះមានការឈឺក្បាលជាមួយនឹងជម្រើសសម្រាប់ក្លឹបធំៗ ដែលចង់បានរូបគេ។
នៅរាត្រីនេះ ក្របខ័ណ្ឌ Bundesliga នឹងចាប់ផ្តើមការប្រកួតឡើងវិញ ហើយ Dortmund នឹងទាត់ក្នុងការប្រកួត Derby តំបន់ Rhur ទល់នឹងគូប្រកួត Schalke 04។ នេះគឺជាឱកាសល្អសម្រាប់ក្រុមអង់គ្លេស ជាពិសេសគឺក្រុម Manchester United ដែលកំពុងសម្លឹងមើល Jadon Sancho ។ បិសាចក្រហមត្រូវបានគេនិយាយថាជាក្លឹបដែលចង់បានការចុះហត្ថលេខារបស់ខ្សែបម្រើសញ្ជាតិអង់គ្លេស Sancho ហើយត្រៀមខ្លួនជះលុយដើម្បីទិញយក។
ប៉ុន្តែយោងទៅតាមលោក Paul Lambert – សមាជិកដែលធ្លាប់ជា Dortmund ដណ្ដើមតំណែងជើងឯក Champions League ក្នុងឆ្នាំ ១៩៩៧។ Sancho មិនគួរចាកចេញទេ គាត់បាននិយាយថា“ គាត់ស្ថិតនៅក្នុងក្រុមដ៏ធំបំផុតមួយនៅលើពិភពលោក ដែលតែងតែមានអ្នកគាំទ្រជាង ៨ ម៉ឺននាក់នៅក្នុងការប្រកួតនីមួយៗ។
ដូច្នេះ Sancho ត្រូវដាក់ចេញនូវការសម្រេចចិត្តដ៏ច្បាស់លាស់មួយ។ Dortmund គឺជាក្លឹបពិសេសមួយ អ្នកគ្រាន់តែដឹងវានៅពេលដែលអ្នកចាកចេញ។ Man United ក៏ជាក្លឹបធំមួយនៅលើពិភពលោកផងដែរប៉ុ ន្តែប្រសិនបើអ្នកសួរខ្ញុំថាតើបរិយាកាសនៅ Old Trafford ស្មើនឹង Dortmund? – ចម្លើយគឺ «ទេ»។
Sancho ត្រូវសួរខ្លួនឯងអំពីជម្រើសរបស់គាត់។ Dortmund ចូលរួម Champions League ទៀងទាត់ ចំណែក Man United យើងមិនប្រាកដទេ។ ប្រសិនបើ Sancho ត្រឡប់មកអង់គ្លេសវិញ គាត់ត្រូវធ្វើការសម្រេចចិត្តចំពោះបាល់ទាត់ ឬគ្រួសារ មិនមែនលុយទេ។
គាត់កំពុងធ្វើបានល្អបំផុតនៅប្រទេសអាឡឺម៉ង់ ដែលខ្លាំងខ្លាបំផុតក្នុងស្ថានភាពមួយទល់មួយ មានល្បឿនល្អ ហើយក៏មានភាពវាងវៃផងដែរ។ នៅពេលណាដែល Dortmund ស៊ុតបញ្ចូលទី អ្នកនឹងមើលឃើញថា Sancho គឺជាអ្នកចូលរួមចំណែកនៅក្នុងនោះ។
គាត់នឹងកាន់តែពូកែថែមទៀត ហើយនឹងក្លាយជាកីឡាករសំខាន់សម្រាប់ប្រទេសអង់គ្លេស អស់រយៈពេលជាច្រើនឆ្នាំ។ ប៉ុន្តែត្រូវធ្វើការជ្រើសរើសត្រឹមត្រូវអំពីអនាគត” ៕
