ការប្រកួតក្របខណ្ឌ English Premier League បានបិទបញ្ចប់ហើយ កាលពីយប់មិញនេះ ដោយមានការប្រែប្រួលមួយចំនួនបានកើតឡើង។
ដោយក្នុងនោះ ក្រុម Top4 គឺ Liverpool , Manchester City , Manchester United និង Chelsea ។ ៤ក្រុមនេះ នឹងបានលេងពានរង្វាន់ UEFA Champions League នៅរដូវកាលក្រោយ។ ដោយឡែកលេខ៥និងលេខ៦វិញ គឺក្រុម Leicester City និង Spurs មានកៅអីនៅ Europa League ។ ត្រលប់ទៅមើលក្រុមកាំភ្លើងធំ ដែលល្បីថាបាន Top4 រាល់ឆ្នាំវិញនោះ រដូវកាលនេះ ពួកគេស្ថិតនៅលេខ៨ក្នុងតារាង។ ក្រុមរបស់លោក Arteta នៅមានឱកាសលេង Europa League បាន ប្រសិនបើអាចឈ្នះ FA Cup ដែលត្រូវប្រកួតផ្ដាច់ព្រ័ត្រទល់ Chelsea បាន។
នៅតំបន់កាត់ចោលវិញ ក្រុម Aston Villa ដែលស្ទើរតែគ្មានសង្ឃឹមអាចរក្សាខ្លួននៅ Premier League បាននោះ បែរជាធ្វើបានល្អរហូតដល់អាចរួចផុតតំបន់កាត់ចោលវិញ។ ពួកគេឈរនៅលេខរៀងទី១៧ ក្រោយពីលេងស្មើក្រុម West Ham នៅប្រកួតចុងក្រោយ។ ការបាន១ពិន្ទុនេះ គឺល្មមសម្រាប់ពួកគេអាចលេងនៅ Premier League ដដែលរដូវកាលក្រោយ។ ដូច្នេះក្រុមដែលត្រូវកាត់ចោលគឺ Norwich City , Watford និង Bournemouth ។
អ្នករកគ្រាប់បាល់បានច្រើនជាងគេរដូវកាលនេះ គឺ Jamie Vardy រកបាន២៣គ្រាប់។ អ្នក Assist ច្រើនជាងគេបានទៅលើ De Bruyne និងអ្នកចាំទីល្អបានទៅលើ Ederson របស់ក្រុម Man City។ ក្រុម Liverpool វិញ បញ្ចប់រដូវកាលដោយមាន៩៩ពិន្ទុ ខ្ពស់បំផុតដូចក្រុម Man City ធ្លាប់ធ្វើបានរដូវកាលមុនដែរ៕
