មុនការបោះឆ្នោត Ballon d’Or ឆ្នាំ ២០២១ និពន្ធនាយករបស់ France Football បានបង្ហាញពីមហិច្ឆតារបស់ Ronaldo នៅពេលប្រកួតប្រជែងជាមួយ Messi សម្រាប់ពានរង្វាន់នេះ។
Cristiano Ronaldo ប្តេជ្ញាបញ្ចប់អាជីពរបស់ខ្លួនជាមួយនឹង Ballon d’Or ច្រើនជាងគូប្រជែង Lionel Messi នេះបានបែកធ្លាយចេញពីអ្នករៀបចំកម្មវិធីពានរង្វាន់ដ៏មានកិត្យានុភាពនេះ Pascal Ferre និពន្ធនាយកទស្សនាវដ្តី France Football ។
Ferre បានប្រាប់កាសែត New York Times ថា «Ronaldo មានមហិច្ឆតាចង់ចូលនិវត្តន៍ជាមួយនឹង Ballon d’Or ច្រើនជាង Messi»។ «ខ្ញុំដឹងព្រោះគាត់ប្រាប់ខ្ញុំ»។
«ការប្រកួតប្រជែងនេះមិនទាក់ទងនឹងលុយទេ។ វាគ្រាន់តែជាពានរង្វាន់ប៉ុណ្ណោះ។ ប៉ុន្តែការកាន់កាប់មួយបន្ថែមទៀតនឹងមានកេរ្ត៍ឈ្មោះល្បីក្នុងប្រវត្តិសាស្ត្រ។
ខ្ញុំគិតថាប្រសិនបើអ្នកក្រឡេកមើលស្ថិតិរបស់ Messi និង Ronaldo អ្នកឃើញថាពួកគេនៅតែស៊ុតបញ្ចូលទីបានច្រើនក្នុងខែកញ្ញា និងតុលា នៅពេលដែលការបោះឆ្នោតត្រូវបានបញ្ចប់។ វាមិនមែនជារឿងចៃដន្យទេ»។
Ronaldo ធ្លាប់ឈ្នះ Ballon d’Or ៥ដង ចំណែក Messi មាន៦លើក មុនពេលពានរង្វាន់ឆ្នាំនេះត្រូវបានប្រកាស ហើយអ្នកទាំងពីរសុទ្ធតែស្ថិតក្នុងបញ្ជីបេក្ខភាពចំនួន៣០រូប។
Ballon d’Or ឆ្នាំ 2021 នឹងត្រូវប្រកាសក្នុងពិធីមួយក្នុងទីក្រុងប៉ារីសយប់នេះ។ ពាក្យចចាមអារ៉ាមអំពីអ្នកឈ្នះបានបន្តរីករាលដាលនៅប៉ុន្មានថ្ងៃកន្លងមកនេះ ប៉ុន្តែ Ferre ទទូចថាលទ្ធផលនៅតែរក្សាយ៉ាងសម្ងាត់ ទោះបីជាគាត់ដឹងរួចហើយថាអ្នកណាឈ្នះក៏ដោយ។
«នេះជាឆ្នាំទីប្រាំមួយរបស់ខ្ញុំដែលទទួលបន្ទុកព្រឹត្តិការណ៍នេះ។ ខ្ញុំមិនទាន់បានបង្ហាញព័ត៌មានណាមួយនៅឡើយទេ។ ខ្ញុំមិនអាចចែកឈ្មោះពួកគេបានទេ ព្រោះពិធីនេះមិនទាន់បានរៀបចំឡើងនៅឡើយទេ»៕
