ខ្សែប្រយុទ្ធរបស់ Watford ក្រុមនៅក្របខ័ណ្ឌកំពូល Premier League អង់គ្លេស គឺកីឡាករ Troy Deeney និយាយថា ច្បាស់ស្ទើរ ១០០ ភាគរយថា យ៉ាងហោចមានកីឡាករស្រឡាញ់ភេទដូចគ្នា ១ នាក់ នៅគ្រប់ក្រុមបាល់ទាត់ទាំងអស់។
កីឡាករ Deeney សង្ស័យថា កីឡាករស្រឡាញ់ភេទដូចគ្នាបារម្ភថា មានការតាមដានបើពួកគេបង្ហាញកាយវិការពីភេទរបស់ខ្លួន តែកីឡាករវ័យ ៣១ ឆ្នាំ បញ្ជាក់ថា ការមានកីឡាករល្បី ១ រូប ដែលហ៊ានចេញមកប្រកាសពីអារម្មណ៍របស់ខ្លួននឹងមានកីឡាករដទៃទៀតធ្វើតាម។
ជួបជាមួយលោក Louis Theroux នៅក្នុងកម្មវិធី Grounded របស់បណ្ដាញព័ត៌មាន BBC កីឡាករ Deeney ប្រាប់ថា៖ «ខ្ញុំនឹងបង្កើតនូវប្រវត្តិសាស្ត្រ ដែលនិយាយថា មានអ្នកស្រឡាញ់ភេទដូចគ្នាម្នាក់នៅគ្រប់ក្រុមបាល់ទាត់ទាំងអស់។ ប្រាកដណាស់ វាស្ទើរតែ ១០០ ភាគរយ។ ខ្ញុំគិតថា មនុស្សដែលស្រលាញ់ភេទដូចគ្នា ពិតជាមានការព្រួយបារម្ភខ្លាំងចំពោះការទទួលខុសត្រូវ ដែលនឹងក្លាយជាមនុស្សដំបូងគេ។ ខ្ញុំគិតថា នៅពេលដែលអ្នកចេញមុខ នឹងមានអ្នកធ្វើតាម»។
អតីតខ្សែប្រយុទ្ធរបស់ក្រុម Norwich និង Nottingham Forest គឺ Justin Fashanu ដែលប្រកាសថា ខ្លួនជាមនុស្សស្រឡាញ់ភេទដូចគ្នាក្នុងឆ្នាំ ១៩៩០ ហើយស្លាប់ក្នុងឆ្នាំ ១៩៩៨ នៅតែជាកីឡាករបាល់ទាត់ស្រឡាញ់ភេទដូចគ្នាម្នាក់គត់ ដែលហ៊ានបង្ហាញជាសាធារណៈក្នុងប្រវត្តិសាស្ត្រចក្រភពអង់គ្លេស។
បើទោះជាទទួលស្គាល់ថា កីឡាករខ្លះខ្លាចមានការរិះគន់ក៏កីឡាករ Deeney ដែលត្រៀមខ្លួនសម្រាប់ការប្រកួតឡើងវិញនៃក្របខ័ណ្ឌ Premier League នៅថ្ងៃទី ១៧ ខែកក្កដា នេះ ជឿថា បច្ចុប្បន្ន គឺជាពេលវេលាល្អសម្រាប់អ្នកកីឡាបុរស ដែលចង់ប្រកាសថា ខ្លួនស្រឡាញ់ភេទដូចគ្នា។
កីឡាករ Deeney និយាយបន្ថែមដូច្នេះថា៖ «ខ្ញុំគិតថា សម័យបច្ចុប្បន្នមានវេទិកាធំជាងមុនក្នុងការឲ្យអត្តពលិកស្រឡាញ់ភេទដូចគ្នាពីធម្មជាតិហ៊ានធ្វើការបង្ហាញសមាសភាពរបស់ខ្លួន»៕
