ម្ចាស់អាវលេខ៧របស់ ក្រុមមេឃខៀវ Manchester City កីឡាករ Raheem Sterling បានសារភាពថា គេពិតជាចង់បានអាវរបស់កំពូលខ្សែប្រយុទ្ធក្រុម Barcelona កីឡាករ Lionel Messi។
Sterling បានរក្សាទុកអាវជាច្រើន ដែលបានមកពីការដោះដូរជាមួយគូប្រកួតល្បីៗក្រោយប្រកួតចប់ ប៉ុន្តែរូបគេនៅមិនទាន់ដាក់តាំងអាវទាំងនោះក្នុងផ្ទះនៅឡើយទេ។
ខ្សែប្រយុទ្ធវ័យ២៥ឆ្នាំ បានបង្ហើបថា ទាល់តែគេបញ្ចប់អាជីពជាកីឡាករ ទើបគេដាក់តាំងអាវទាំងនោះ ជាមួយនឹងពានរង្វាន់ដែលគេទទួលបានតែម្ដង។
Sterling បាននិយាយលម្អិតយ៉ាងដូច្នេះថា៖
ខ្ញុំចូលចិត្តដោះដូរអាវជាមួយគូប្រកួត ប៉ុន្តែខ្ញុំមិនទាន់បានដាក់តាំងមួយនៅឡើយទេ។ ព្រោះខ្ញុំមិនចូលចិត្ត ឲ្យភ្ញៀវចូលមកផ្ទះខ្ញុំឃើញថា ខ្ញុំជាកីឡាករបាល់ទាត់។ ប៉ុន្តែច្បាស់ណាស់ នៅពេលដែលខ្ញុំចូលនិវត្តន៍ ខ្ញុំនឹងធ្វើបន្ទប់មួយដើម្បីដាក់ពានរង្វាន់ ដែលខ្ញុំទទួលបាន ហើយខ្ញុំនឹងជ្រើសរើសអាវគូប្រកួតណាមួយ ដែលខ្ញុំពេញចិត្ត ដាក់តាំងក្នុងទីនោះ។ យ៉ាងណាមិញ មានតែអាវមួយគត់ដែលខ្ញុំចង់បានខ្លាំងបំផុត នោះគឺអាវរបស់ Messi។ កាលពីពួកយើងលេងទល់នឹង Barcelona ខ្ញុំបានទទួលអាវពី Neymar ហើយនោះជាលើកទី១ហើយ ដែលខ្ញុំសុំអាវពីកីឡាករដទៃ៕
