ការប្រកួតនៅក្របខ័ណ្ឌ Premier League អាចនឹងលេងតិចជាង៩០នាទី ពេលដែលរដូវកាលបន្តលេងសាជាថ្មី។ នេះបើតាមការនិយាយរបស់លោក Gordon Taylor ប្រធាននាយកប្រតិបត្តិសមាគមកីឡាករបាល់ទាត់អាជីវ (PFA)។
មន្ត្រីជាន់ខ្ពស់កំពុងពិចារណាវិធានការមួយចំនួនដើម្បីពង្រឹងសុវត្ថិភាពនៃកីឡាករនិងបុគ្គលិកពីវិបត្តិវីរុសកូរ៉ូណា រួមមាន ទីកន្លែងប្រកួតអព្យាក្រឹត និងការបន្ថែមកីឡាករបម្រុងក្នុងរាល់ប្រកួត។ សម្រាប់ពេលនេះលោក Taylor បានលើកឡើងថា សំណើនៃការពង្រួមពេលវេលាប្រកួតក្នុងមួយតង់ៗកំពុងស្ថិតនៅលើតុយកទៅពិភាក្សាជាមួយក្លឹបទាំង២០នៅសប្ដាហ៍នេះ។
សាកសួរពីការរំសាយលីគ លោក Taylor បានបកស្រាយថា គ្រប់យ៉ាងត្រូវរងចាំនិងមើលទាំងអស់គ្នា។ គ្មាននរណាដឹងពីអនាគតនោះទេ។ រឿងរ៉ាវកីឡាករបម្រុង ការប្រកួតអាចមិនពេញ៤៥នាទីក្នុងមួយតង់ ទីកន្លែងប្រកួតអព្យាក្រឹត និងរឿងជាច្រើនទៀតកំពុងដាក់គិតគូរ។
លោកបន្ថែមថា៖ “ពួកយើងកំពុងព្យាយាមរង់ចាំមើលថាតើសំណើមានអ្វីខ្លះនិងមានការគោរពអនុញ្ញាតឲ្យអ្នកគ្រប់គ្រង គ្រូបង្វឹកនិងកីឡាករទាំងអស់បំពេញបន្ថែមនូវអ្វីដែលបានស្នើឡើង”។
