ក្រុម Bayern Munich ហាក់មានសង្ឃឹមកាន់តែខ្ពស់មែនទែនហើយក្នុងការឈ្នះពានក្របខ័ណ្ឌ Bundesliga ៨ សម័យកាលជាប់ៗគ្នា ក្រោយយកឈ្នះក្រុមក្បែរតំបន់គ្រោះថ្នាក់ Fortuna Dusseldorf ជាមួយនឹងលទ្ធផល ៥-០ ដោយក្នុងនោះខ្សែប្រយុទ្ធ Robert Lewandowski បានស៊ុតបញ្ចូលទីបាន ២ គ្រាប់ម្នាក់ឯង ក្នុងការប្រកួតដែលធ្វើឡើងដោយបិទទ្វារនេះ។
សម្រាប់ការប្រកួតកាលយប់ថ្ងៃសៅរ៍នោះ Bayern ក្នុងនាមជាក្រុមខ្លាំង និងជាម្ចាស់ផ្ទះផងនោះ បានដាក់សម្ពាធទៅក្រុម Duesseldorf យ៉ាងខ្លាំង រហូតដល់មានឱកាសនាំមុខបានសម្រេច ១-០ នៅនាទីទី ១៥ ដែលជាការធ្វើឲ្យចូលទីខ្លួនឯង (Own-Goal) ពីសំណាក់ខ្សែការពារ Mathias Joergensen របស់ក្រុមភ្ញៀវ មុននឹងកីឡាករ Benjamin Pavard ដែលជាខ្សែការពារស្ដាំ ស៊ុតបានសម្រេចនៅនាទីទី ២៩ បន្ថែមការនាំមុខ ១ គ្រាប់ទៀតសម្រាប់ក្រុមជើងឯកចាស់។
ជិតបញ្ចប់វគ្គទី១ គឺនាទីទី ៤៣ កីឡាករ Lewandowski បំប៉ោងសំណាញ់ទីគ្រាប់ទី ៣ ឲ្យក្រុម Bayern មុននឹងមានឱកាសបន្ថែមគ្រាប់ទី ៤ ក្នុងវគ្គទី២ នាទីទី ៥០ ខណៈ ២ គ្រាប់នេះបានធ្វើឲ្យកីឡាករអន្តរជាតិប៉ូឡូញរូបនេះ រកបាន ២៩ គ្រាប់ ហើយនៅក្របខ័ណ្ឌ Bundesliga។ ទោះនាំមុខ ៤-០ ក៏ក្រុមម្ចាស់ផ្ទះមិនបានបន្ធូរជើងឲ្យក្រុមភ្ញៀវដែរ ហើយនៅទីបំផុតខ្សែការពារឆ្វេង Alphonso Davies ក៏មានឱកាសរកបាន ១ គ្រាប់នឹងគេដែរ ខណៈវាក៏គ្រាប់ចុងក្រោយសម្រាប់ការប្រកួតនេះផងដែរ ដូច្នេះលទ្ធផលផ្លូវការក្រុម Bayern Munich ឈ្នះ Fortuna Dusseldorf ៥-០។
ក្រោយដណ្ដើមបាន ៣ ពិន្ទុ ពីការប្រកួតសប្ដាហ៍ទី ២៩ នេះ ធ្វើឲ្យលោកគ្រូបង្វឹក Hansi Flick ដឹកនាំក្រុមឈ្នះជាលើកទី ២២ ក្នុងចំណោម ២៥ ប្រកួតដំបូង ដោយស្ថិតិនេះ គឺប្រសើរជាងស្ថិតិរបស់លោក Pep Guardiola ដែលចាប់ផ្ដើមចូលមកកាន់តំណែងកាលពីឆ្នាំ ២០១៣ ហើយអ្វីដែលសំខាន់ គឺជ័យជម្នះនេះអាចបន្ថែមគម្លាតនាំមុខរហូតដល់ ១០ ពិន្ទុ ពីលើក្រុមលេខ ២ Borussia Dortmund ដែលប្រកួតតិចជាង ១ លើក។
លោក Flick ដែលមកធ្វើតួនាទីជំនួសលោក Niko Kovac កាលពីខែវិច្ឆិកា ឆ្នាំមុន ក្រោយការប្រកួតបញ្ចប់ទៅបាននិយាយថា៖ «ស្ថិតិ ឬកំណត់ត្រាមិនបានធ្វើឲ្យខ្ញុំចាប់អារម្មណ៍នោះទេ អ្វីដែលសំខាន់ គឺក្រុមមានរដូវកាលដ៏ជោគជ័យមួយ។ នៅជាមួយក្រុម Bayern Munich អ្នករំពឹងឈ្នះតែម៉្យាងប៉ុណ្ណោះ។ ខ្ញុំសប្បាយចិត្ត ដែលយើងធ្វើការគាបសង្កត់បានយ៉ាងល្អ និងមិនបើកឱកាសឲ្យពួកគេសូម្បីបន្តិចក្នុងការប្រកួតនេះ ហើយសង្ឃឹមថា នឹងបន្តធ្វើបានល្អបែបនេះ ក្នុងការប្រកួតបន្តបន្ទាប់ទៀត»។
ខណៈការប្រកួតនៅសល់តែ ៥ សប្ដាហ៍ទៀត នឹងបញ្ចប់បានធ្វើឲ្យ Bayern Munic ក្រុមដែលមានរហស្សនាមថា «Star of the South» មានឱកាសកាន់តែខ្ពស់ឡើងៗ ក្នុងការលើកពានលីកកំពូលរបស់អាល្លឺម៉ង់ ៩ រដូវកាលជាប់ៗគ្នា ក៏ដូចជាលើកទី ៣០ ក្នុងប្រវត្តិសាស្ររបស់ក្លិបផងដែរ ពោលគឺច្រើនជាងក្លិបណាៗទាំងអស់ គិតចាប់តាំងពីលីកកំពូលមួយនេះត្រូវបានបង្កើតឡើងក្នុងឆ្នាំ ១៩៦៣។
លទ្ធផលគូផ្សេងៗ ដែលប្រកួតក្នុងថ្ងៃជាមួយគ្នា គឺក្រុម Freiburg ប្រកួតចាញ់ក្រុម Bayer Leverkusen ០-១, ក្រុម Hertha BSC ប្រកួតឈ្នះក្រុម Augsbur ២-០, ក្រុម Mainz 05 បរាជ័យក្នុងផ្ទះខ្លួនឯងក្រោមថ្វីជើងក្រុម Hoffenheim ០-១, ក្រុម Schalke 04 ចាញ់ក្រុម Bremen ០-១ រីឯក្រុមម្ចាស់ផ្ទះ Wolfsburg ចាញ់ក្រុមភ្ញៀវ Frankfurt ១-២៕
