កីឡាករ Jadon Sancho ធ្វើបានហែតទ្រីក (hat-trick) ពោលគឺស៊ុតបញ្ចូលទីបាន ៣ គ្រាប់ ក្នុងប្រកួតដែលក្រុម Borussia Dortmund បំបាក់ក្រុមបាតតារាង Paderborn យ៉ាងចាស់ដៃជាមួយនឹងលទ្ធផល ៦-១ ខណៈរាល់ការអបអរម្ដងៗ ខ្សែបម្រើស្លាបសញ្ជាតិអង់គ្លេសរូបនេះ តែងតែបើកបង្ហាញអាវខាងក្នុង ដែលសរសេរថា «Justice for George Floyd» (យុត្តិធម៌សម្រាប់ George Floyd)។
ជ័យជម្នះរបស់ក្រុមដែលមានរហស្សនាមថា អធិរាជខ្មៅលឿង កាលពីយប់ថ្ងៃអាទិត្យកន្លងទៅនេះ ធ្វើឲ្យមានសង្ឃឹមតិចតួចដែរ ក្នុងការតាមប្រជែងយកពាន Bundesliga ក្របខ័ណ្ឌកំពូលរបស់អាល្លឺម៉ង់ ព្រោះថាពេលនេះ អាចកាត់បន្ថយគម្លាតនាំមុខរបស់ក្រុមកំពូលតារាង Bayern Munich ពី ១០ មកត្រឹម ៧ ពិន្ទុ។
យ៉ាងណាការប្រកួតដែលធ្វើឡើងដោយបិទទ្វារកីឡដ្ឋាន Benteler-Arena នេះ ត្រូវរង់ចាំដល់វគ្គទី ២ ទើបមានគ្រាប់បាល់កើតឡើង ក្រោយកីឡាករ Thorgan Hazard ស៊ុតបានសម្រេច ១ គ្រាប់ នៅនាទីទី ៥៤ ជួយឲ្យ Dortmund នាំមុខក្រុមម្ចាស់ផ្ទះ ១-០ មុននឹងកីឡាករ Sancho រកឃើញគ្រាប់ដំបូងរបស់ខ្លួន សម្រាប់ការប្រកួតនេះ នៅនាទីទី ៥៧ បន្ថែមគម្លាតនាំមុខទៅឆ្ងាយបន្តិច។
នាទីទី ៧២ ក្រុម Paderborn បានបន្ថយការនាំមុខត្រឹម ១-២ វិញ បន្ទាប់ពីខ្សែការពារ Uwe Huenemeier មិនភ្លាត់ ក្នុងការស៊ុតបាល់ពិន័យ ១១ ម៉ែត្រ តែមិនទាន់បានប៉ុន្មាននាទីទីផង ពោលគឺ ២ នាទីបន្ទាប់ កីឡាករ Sancho មានឱកាសបំប៉ោងសំណាញ់ទីគ្រាប់ទី ២ របស់ខ្លួន ក៏ដូចជាជួយឲ្យក្រុម នាំមុខ ២ គ្រាប់វិញផងដែរ ខណៈក្រោយមក ក្រុមម្ចាស់ផ្ទះហាក់លែងមានសិទ្ធិតដៃហើយ ព្រោះសល់ការប្រកួតសល់ត្រឹម ៥ នាទីចុងក្រោយ ក្រុមភ្ញៀវបានស៊ុតបញ្ចូលទីផ្ទួនៗតែម្ដង ដោយនាទីទី ៨៥ ជាគ្រាប់បាល់របស់ Achraf Hakimi ហើយនាទីទី ៨៩ ជារបស់ Marcel Schmelzer ខណៈនាទីទី ៩០ ជាគ្រាប់បាល់ហែតទ្រីករបស់ Sancho។
យ៉ាងណាក្រោយការប្រកួតបញ្ចប់ទៅមិនមានសម្ដីរបស់កីឡាករណា ឬគ្រូបង្វឹករបស់ក្រុម Dortmund បញ្ចេញមតិយោបល់អ្វីឡើយ ក្រៅតែពីអ្នកចាំទី Roman Buerki ដែលនិយាយខ្លីៗថា៖ «យើងនឹងធ្វើគ្រប់យ៉ាង ដើម្បីឈ្នះគ្រប់ការប្រកួតដែលនៅសល់»។
ដោយឡែកពាក់ព័ន្ធនឹងការបង្ហាញអក្សរនៅលើអាវរបស់កីឡាករទាំងនោះវិញ កើតឡើងក្រោយមានបុរសស្បែកខ្មៅម្នាក់អាយុ៤៦ឆ្នាំ ឈ្មោះ George Floyd បានស្លាប់ថ្មីៗនេះ នៅទីក្រុង Minneapolis រដ្ឋ Minnesota សហរដ្ឋអាមេរិក អំឡុងពេលមានការចាប់ខ្លួនពីប៉ូលិសម្នាក់ ដែលពេលនោះ បានផ្ដួលបុរសរូបនេះ ទៅដី ហើយយកជង្គង់សង្កត់កអស់ជាច្រើននាទី។ ហេតុការណ៍នោះ បានបង្កឲ្យមានការរិះគន់ទូទាំងសហរដ្ឋអាមេរិក រហូតដល់ប្រទេសផ្សេងៗ ក្នុងនោះអត្តពលិកកីឡាអាជីព ជាពិសេសកីឡាករស្បែកខ្មៅតែម្ដង។
សម្រាប់ក្របខ័ណ្ឌ Bundesliga របស់ប្រទេសអាល្លឺម៉ង់ គិតត្រឹមសប្ដាហ៍ទី ២៩ នេះ ឃើញថាក្រុម Bayern ឈរនៅចំណាត់លេខ ១ មាន ៦៧ ពិន្ទុ តាមពីក្រោយដោយ Dortmund មាន ៦០ ពិន្ទុ ខណៈលេខ ៣ និងលេខ ៤ គឺក្រុម Moenchengladbach និង Leverkusen មាន ៥៦ ពិន្ទុដូចគ្នា រីឯក្រុមបាតតារាង គឺ Werder Bremen (២៥ ពិន្ទុ) និង Paderborn (១៩ ពិន្ទុ)៕
