លោក Setien អ្នកចាត់ការក្រុម FC Barcelona ថាការប្រកួតនៅសល់៩ប្រកួតទៀតនោះ ក្រុមរបស់លោកអាចនឹងបាត់ពិន្ទុខ្លះ មិនអាចទទួលបានពេញនោះទេ។
ការប្រកួតលីគកំពូលអេស្ប៉ាញនៅសល់តែ៩ប្រកួតទៀតប៉ុណ្ណោះ នឹងចប់រដូវកាលនេះហើយ។ ក្រុម Barcelona កំពុងនៅលើកំពូលតារាង ដោយដាច់ពិន្ទុ២ពិន្ទុពីក្រុម Real Madrid ។ ដោយសារតែលើសខ្វះគ្នាតិចនេះហើយ ទើបបានជាគេមិនទាន់អាចប៉ាន់ស្មានបានថាក្រុមណាមួយនឹងគ្រងជើងឯកនៅឡើយទេ ពោលគឺត្រូវរង់ចាំមើលរហូតដល់ចប់រដូវកាលតែម្ដង។
សម្រាប់លោក Setien អ្នកចាត់ការក្រុម Barcelona បានបង្ហើបថាក្រុមរបស់លោកអាចនឹងបាត់ពិន្ទុខ្លះពីការប្រកួតនៅសល់៩ប្រកួតខាងមុខនេះ។ តែអ្វីដែលល្អវិញនោះគឺការចាប់ផ្ដើម២ប្រកួតកន្លងមក គឺអាចរក្សាសំណាញ់ទីបានល្អ ហើយលោករំពឹងថាវានឹងបន្ដល្អរហូតដល់ចប់រដូវកាលនេះទៅ។ ការឈ្នះគ្រប់ការប្រកួត គឺមិនមែនជារឿងស្រួលនោះទេ។
រំលឹកថាក្រុមអ្នកមានបុណ្យ Barcelona នឹងមានការប្រកួតទៀតហើយនៅរាត្រីនេះ។ ពួកគេនឹងត្រូវប៉ះក្រុមខ្លាំងល្មមដែរគឺ Sevilla នៅវេលាម៉ោង៣រំលងអាធ្រាត្រ៕
