ក្រុម Bayern Munich ដែលក្លាយជាជើងឯកក្របខ័ណ្ឌ Bundesliga រួចហើយ តាំងពីសប្ដាហ៍មុននោះ បានធ្វើពិធីអបអរលើកពានរង្វាន់នេះ កាលពីថ្ងៃសៅរ៍កន្លងទៅ ក្នុងកីឡដ្ឋានដែលអត់មានអ្នកគាំទ្រមកចូលរួម ក្រោយបញ្ចប់ការប្រកួតចុងក្រោយនៃរដូវកាល ដោយការបំបាក់ក្រុមម្ចាស់ផ្ទះ Wolfsburg ៤-០។
សម្រាប់ការប្រកួតបិទរដូវកាលនេះ ក្រុម Bayern បើទោះគ្រងជើងឯកទៅហើយក្ដី ក៏មិនបន្ធូរជើងឲ្យក្រុមគូប្រជែងដែរ ពោលគឺលេងដូចត្រូវការពិន្ទុចាំបាច់អ៊ីចឹង ដោយត្រឹមតែ ៤ នាទីប៉ុណ្ណោះ ខ្សែបម្រើសញ្ជាតិបារាំង Kingsley Coman ជួយឲ្យក្រុមខ្លួននាំមុខបាត់ទៅហើយ ខណៈ ៨ នាទី មុនចប់វគ្គទី ១ ពោលគឺនាទីទី ៣៧ ខ្សែបម្រើ Mickael Cuisance បន្ថែមការនាំមុខ ១ គ្រាប់ទៀត។
វគ្គទី ២ ក្រុម Bayern ទទួលបានបាល់ពិន័យ ១១ ម៉ែត្រ ហើយខ្សែប្រយុទ្ធប៉ូឡូញ Robert Lewandowski ដែលជាកីឡាកររកគ្រាប់បាល់បានច្រើនជាងគេ (top scorer) ក៏ធ្វើបានសម្រេចគ្រាប់ទី ៣៤ ដូច្នេះ រូបគេ ក៏បញ្ចប់រដូវកាលជាមួយនឹងពានអ្នកស៊ុតបញ្ចូលទីបានច្រើនជាងគេជាលើកទី ៥ នៅBundesliga និងជាលើកទី ៣ ជាប់ៗគ្នា។ នាទីទី ៧៩ កីឡាករ Mueller បង្ហើយគ្រាប់ជ័យជម្នះចុងក្រោយឲ្យក្រុមឈ្នះ ៤-០។
ទោះជារដូវកាលបានបញ្ចប់ទៅទាំងស្រុង ក្រោយពីបានចាប់ផ្ដើមវិញ បន្ទាប់ពីផ្អាកជាង ២ ខែ ដោយសារការរាលដាលនៃវីរុសកូរ៉ូណា ក៏ការអបអរសម្រាប់ក្រុមជើងឯកនៃលីកកំពូលរបស់ប្រទេសអាល្លឺម៉ង់ មួយនេះ មិនបានធ្វើដូចរដូវកាលមុនៗឡើយ ពោលគឺប្រព្រឹត្តទៅយ៉ាងប្លែក ដោយក្រុមម្ចាស់ជើងឯក ត្រូវឆ្លងពិធីលើកពានរង្វាន់របស់ខ្លួនក្នុងកីឡដ្ឋានដែលទទេស្អាត ដោយគ្មានក្រុមគ្រួសារ អ្នកគាំទ្រ ឬមិត្តភក្ដិ ចូលរួមឡើយ។
នាយកប្រតិបត្តិនៃលីកបាល់ទាត់អាល្លឺម៉ង់ លោក Christian Seifert បានថ្លែងនៅក្នុងសុន្ទរកថាមុនពិធីប្រគល់ពានរង្វាន់នោះថា៖ «នេះគឺជាពេលវេលាដ៏ពិសេស និងប្លែកមួយ។ យើងមិនធ្លាប់ឆ្លងកាត់ការបញ្ចប់រដូវកាលបែបនេះពីមុនមកឡើយ។ អត់មានអ្នកគាំទ្រ គ្មានសំឡេងកញ្ចែ គ្មានសំឡេងអបអរសាទរ។ នេះមិនមែនជា Bundesliga ដែលយើងចង់បាននោះឡើយ តែមាន Bundesliga តែមួយគត់ ដែលអាចធ្វើការប្រកួត ក្នុងស្ថានភាពបែបនេះបាន»។
សម្រាប់ក្របខ័ណ្ឌ Bundesliga ក្រោយក្រុមទាំង ១៨ បានបញ្ចប់ការប្រកួតគ្រប់ទាំង ៣៤ សប្ដាហ៍របស់ខ្លួនឃើញថា ក្រុមជើងឯក គឺ Bayern Munich ខណៈ Borussia Dortmund ជាក្រុមរងជើងឯក ហើយក្រុមលេខ ៣ និងលេខ ៤ គឺ RB Leipzig និង Borussia Monchengladbach រីឯក្រុមត្រូវកាត់ឲ្យទៅលេងលីកទី ២ រដូវកាលក្រោយ មាន ២ ក្រុមត្រូវធ្លាក់ស្វ័យប្រវត្តិ គឺ Dusseldorf និង Paderborn ខណៈក្រុម Bremen ត្រូវរង់ចាំប្រកួតកាត់ក្ដី (Playoff) ជាមួយក្រុមលេខ ៣ នៅ Bundesliga 2 ដើម្បីសម្រេចថា ក្រុមណានឹងមានសិទ្ធិបង្ហាញវត្តមាននៅលីកកំពូល៕
