លោក Setien អ្នកចាត់ការក្រុម FC Barcelona ថាខ្សែប្រយុទ្ធ Lionel Messi នឹងបញ្ចប់អាជីពបាល់ទាត់របស់ខ្លួននៅទឹកដី Camp Nou ដោយមិនចាកចេញទៅណាទៀតទេ។
ប្រធានក្រុមអ្នកមានបុណ្យខាងលើ នៅសល់កុងត្រាត្រឹម១រដូវកាលទៀតប៉ុណ្ណោះ ហើយបច្ចុប្បន្ននេះមានដំណឹងថាក្លឹបជាច្រើនកំពុងចរចាយករូបគេទៅហើយ។ តែទោះជាយ៉ាងនេះក្ដី Setien អ្នកចាត់ការក្រុម Barca ដែលចូលមកដឹកនាំកាលពីខែមករាកន្លងទៅ មានទំនុកចិត្តថា Messi នឹងស្មោះស្ម័គ្រ មិនចាកចេញទៅណាទេ។ រូបគេនឹងចូលនិវត្តន៍នៅក្លឹបនេះតែម្ដង។
Setien បាននិយាយថា៖ “បញ្ហាតែងតែកើតមានឡើងសម្រាប់ក្លឹបធំៗ។ ខ្ញុំមិនគិតថារឿងដែលបានកើតឡើងដោយសារតែ Covid-19 នឹងធ្វើឱ្យកីឡាករដូច Messi គិតចង់ចាកចេញពីក្លឹបឡើយ។ ខ្ញុំច្បាស់ណាស់ថាគាត់នឹងបញ្ចប់អាជីពនៅទីនេះ។ គ្មានក្លឹបណាមួយអាចអន្ទង់ចិត្តគេឱ្យចាកចេញបានឡើយ”៕
