អ្នកចាត់ការក្រុមបិសាចក្រហមលោក Ole Gunnar Solskjaer បានសារភាពថា Bruno Fernandes ពិតជាមានឥទ្ធិពលខ្លាំងចាប់តាំងពីបានចូលរួមជាមួយក្លឹបកាលពីខែមករា។
Fernandes បានរកគ្រាប់បាល់ទី ៨ នៅ Premier League រដូវកាលនេះក្នុងជ័យជម្នះ ២-០ កាលពីថ្ងៃអាទិត្យលើក្រុម Leicester City ។ លទ្ធផលនេះបានធ្វើឱ្យក្រុមបិសាចក្រហមទទួលបានចំណាត់ថ្នាក់លេខ ៣ ដែលមានន័យថា ក្រុមបិសាចក្រហមអាចលេងវគ្គជម្រុះ Champions League រដូវកាលក្រោយបាន។
លោក Solskjaer បាននិយាយថា “យើងត្រូវតែទទួលស្គាល់ថា គាត់ពិតជាកីឡាករដែលមានឥទ្ធិពលខ្លាំងណាស់សម្រាប់ក្រុម ហើយគាត់បានរកគ្រាប់បាល់ និងបង្កើតឱកាសគ្រាប់បាល់ជាច្រើន។ ប៉ុន្តែអ្វីដែលសំខាន់នោះគឺភាពរីករាយរបស់គាត់ក្នុងការលេងនៅទីនេះ និងចិត្តគំនិតចង់ឈ្នះរបស់គាត់ផងដែរ។
អ្នកអាចមើលឃើញច្បាស់ពីមហិច្ឆតារបស់គាត់ ហើយគាត់ពេលខ្លះក៏មានការរអ៊ូរទាំខ្លះដែរ ប៉ុន្តែយើងនឹងមិនឱ្យមានរឿងបែបហ្នឹងកើតឡើងម្តងទៀតលើគាត់នោះទេ ដោយសារតែគាត់បានរីកចម្រើនពីមួយថ្ងៃទៅមួយថ្ងៃ៕
