អតីតអ្នកចាំទីដៃទី១ របស់ក្រុម Manchester United លោក Peter Schmeichel បានចុចឈ្មោះខ្សែបម្រើសញ្ជាតិប្រេស៊ីល Fred ថាជាកីឡាករឆ្នើមប្រចាំក្រុមបិសាចក្រហម ក្នុងរដូវកាលនេះ។
លោក Schmeichel បានបើកឲ្យអ្នកគាំទ្រសួរនាំនៅលើបណ្ដាញសង្គម Twitter កាលពីថ្ងៃច័ន្ទ។ កំឡុងពេលនោះ លោកបានទទួលសំណួរមួយពីអ្នកគាំទ្រ ដោយសួរមកថា តើកីឡាកររូបណាដែលលោកគិតថា ឆ្នើមជាងគេប្រចាំក្រុម Man UTD ក្នុងរដូវកាលនេះ? ភ្លាមៗនោះ លោកបានតបទៅវិញយ៉ាងខ្លីថា “ Fred” ។
ខ្សែបម្រើវ័យ២៧ឆ្នាំ បានផ្លាស់ពីក្រុម Shakhtar Donetsk មកចូលរួមជាមួយ Man UTD កាលពីខែមិថុនា ឆ្នាំ២០១៨ ក្នុងតម្លៃផ្ទេរ៥២លានផោន (ឬប្រមាណ ៦៥លានដុល្លារ)។
ប៉ុន្តែក្នុងរដូវកាលដំបូង ក្រោមការដឹកនាំរបស់លោក Jose Mourinho គេហាក់សម្របខ្លួនមិនត្រូវនឹងប្រព័ន្ធលេងរបស់គ្រូបង្វឹកសញ្ជាតិព័រទុយហ្កាល់ ជាហេតុធ្វើឲ្យគេបង្ហាញទម្រង់លេងមិនសូវបានល្អ ពោលនៅឆ្នាំនោះគេចូលលេងឲ្យ Man UTD បានត្រឹម១៧ប្រកួតប៉ុណ្ណោះ។
លុះឈានចូលរជ្ជកាលលោក Ole Gunnar Solskjaer ដឹកនាំ Fred បានកែប្រែទម្រង់លេងល្អជាងមុនគួរឲ្យកត់សម្គាល់។ ជាក់ស្ដែងក្នុងរដូវកាលនេះ គេតែងត្រូវបានគ្រូបង្វឹកសញ្ជាតិន័រវេស ផ្ដល់ការទុកចិត្តលេងក្នុងជម្រើស១១នាក់ដំបូង។
តួយ៉ាងមុនពេលក្លិបផ្អាកសកម្មភាពប្រកួត ដោយសារជំងឺ Covid-19 ជម្រើសជាតិប្រេស៊ីលចូលលេង ឲ្យក្រុមបិសាចក្រហមបាន៣៤ប្រកួត ក្នុងនោះគេរួមចំណែករកគ្រាប់បាល់បាន៦គ្រាប់ (ស៊ុត២ Assist ៤)៕
