ក្រុមហង្សក្រហម Liverpool កាន់តែកៀកនឹងការឈ្នះពានក្របខ័ណ្ឌ Premier League មែនទែនហើយ ក្រោយក្រុមកំពូលតារាងមួយនេះ បំបាក់ក្រុម Crystal Palace ៤-០ អំឡុងការប្រកួតនៅផ្ទះខ្លួនឯង កាលពីយប់ថ្ងៃពុធ ខណៈថ្ងៃជាមួយគ្នាខ្សែប្រយុទ្ធអន្តរជាតិបារាំង Anthony Martial ធ្វើបានហ៊ែតទ្រីក (hat-trick) ពេលក្រុមបិសាចក្រហម Manchester United ឈ្នះក្រុមភ្ញៀវ Sheffield United ៣-០។
សម្រាប់ការប្រកួតដែលធ្វើឡើងដោយបិទទ្វារកីឡដ្ឋាន Anfield ក្រុម Liverpool របស់លោក Jurgen Klopp ចាប់ផ្ដើមមានប្រៀបកាន់តែខ្លាំង ដោយសារគ្រាប់បាល់នៅវគ្គទី ១ របស់ខ្សែការពារ Alexander-Arnold នាទីទី ២៣ និងខ្សែប្រយុទ្ធ Mohamed Salah នាទីទី ៤៤ ខណៈគ្រាប់បាល់ ក្នុងតង់ទី ២ ដែលស៊ុតដោយខ្សែបម្រើ Fabinho នាទីទី ៥៥ និងខ្សែប្រយុទ្ធ Sadio Mane នាទីទី ៦៩ បានធ្វើក្រុមហង្សក្រហមស្ទើរតែក្លាយជាជើងឯកនៅលីកកំពូលរបស់ប្រទេសអង់គ្លេស រដូវកាលនេះស្រេចបាច់ទៅហើយ។
ការដណ្ដើមបាន ៣ ពិន្ទុ ក្នុងសប្ដាហ៍ទី ៣១ នេះ ធ្វើក្រុម Liverpool នាំមុខដាច់លើក្រុមលេខ ២ Manchester City ២៣ ពិន្ទុ ហើយបើក្រុមជើងឯកចាស់ មិនអាចយកឈ្នះក្រុម Chelsea ក្នុងជំនួបនៅឯកីឡដ្ឋាន Stamford Bridge បានទេនោះ អ៊ីចឹង ពានរង្វាន់ក្របខ័ណ្ឌ Premier League ជារបស់ក្រុម Liverpool ហើយ។ តែបើក្រុម Man City អាចទៅយកជ័យជម្នះលើក្រុមនៅភាគខាងលិចក្រុងឡុងដ៍បាន បានន័យថា តំណែងជើងឯកនេះ ត្រូវចាំមើលការប៉ះគ្នារវាងក្រុមលេខ ១ និងលេខ ២ នៅកីឡដ្ឋាន Etihad នាថ្ងៃទី ២ ខែកក្កដា។
លោក Klopp ដែលកំពុងជិតក្លាយជាគ្រូបង្វឹកដំបូងគេ ជួយឲ្យក្រុម Liverpool លើកពានលីកកំពូលអង់គ្លេស ក្នុងរយៈពេល ៣០ ឆ្នាំ និយាយថា៖ «សាកស្រមៃលមើល បើសិនជាកីឡដ្ឋានអាចមានមនុស្សពេញ ហើយអ្នកទាំងអស់នោះ អាចទទួលបាននូវរសជាតិជីវិតបែបនេះ។ វានឹងកា្លយទៅរឿងអស្ចារ្យមែនទែន។ បរិយាកាសនៅលើទីលាន ពិតជាពិសេសណាស់។ វាជាការប្រកួត ដែលគាបសង្កត់បានល្អបំផុត ពេលលេងដោយបិទទ្វារបែបនេះ។ ពួកគេធ្វើបានល្អមែនទែន»។
ដោយឡែក ក្រុម Man United ពិតមែនតែមិនប្រកួត ដើម្បីប្រជែងជើងឯក តែក្រុមដែលដឹកនាំដោយលោក Ole Gunnar Solskjaer មួយនេះ នៅត្រូវការចំណាត់ថ្នាក់សម្រាប់ក្របខ័ណ្ឌអឺរ៉ុប ហើយពួកគេក៏បានបង្ហាញថា មានសិទ្ធិខ្ពស់ក្នុងការដណ្ដើមតំណែង ១ ក្នុងចំណោមក្រុមកំពូលទាំង ៤ (Top4) បានសម្រេច ក្រោយយកឈ្នះក្រុម Sheffield United ៣-០ នៅទឹកដី Old Trafford។
យ៉ាងណា ៣ គ្រាប់ ដែលនាំឲ្យក្រុមបិសាចក្រហម មិនស្គាល់បរាជ័យរហូតដល់ ១៣ លើកនេះ ស៊ុតបញ្ចូលទីដោយកីឡាករតែម្នាក់ប៉ុណ្ណោះ គឺ Martial នៅនាទីទី ៧, ៤៤ និង ៧៤ ហើយជោគជ័យនេះ បានធ្វើឲ្យក្រុម Man United តាមពីក្រោយក្រុមលេខ ៤ Chelsea ២ ពិន្ទុ។
លោក Solskjaer ចូលរួមត្រេកអរនឹងកីឡាករ Martial ដោយនិយាយថា៖ «សុំរីករាយជាមួយ Martial ផង។ គ្រាប់ទី ៣ គឺអស្ចារ្យ តែខ្ញុំពេញចិត្តគ្រាប់ទី ២ ជាង។ គាត់់ត្រៀមខ្លួនរួចជាស្រេចក្នុងប្រអប់។ យើងព្យាយាមធ្វើឲ្យមានស្ថានភាពបែបហ្នឹងញឹកញាប់។ ដោយជាក់ស្ដែងក្រុមយើងស័ក្តិសមឈ្នះ»៕
