អតីតគ្រូបង្វឹករបស់ Inter Milan និង Manchester City លោក Roberto Mancini បានឲ្យដឹងថា Zlatan Ibrahimovic មានកម្រិតខ្ពស់ស្មើនឹងកំពូលកីឡាករទាំងពីរគឺ Lionel Messi និង Cristiano Ronaldo។
Messi និង Ronaldo គឺជាកីឡាករដែលកំពុងធ្វើឲ្យពិភពបាល់ទាត់កក្រើកនៅទសវត្សរ៍នេះ ដោយពួកគេទាំងពីរអាចឈ្នះពាន Ballon d’Or ដល់ទៅ១១លើក (Ronaldo ៥លើក និង Messi ៦លើក) ហើយបើគិតគ្រាប់បាល់របស់ពួកគេទាំងពីរបូកបញ្ចូលគ្នាវិញគឺរហូតដល់ទៅ ១,៤២២គ្រាប់។
Ibrahimovic រកបានគ្រាប់បាល់ ៥៤០គ្រាប់ក្នុងអាជីពជាកីឡាកររបស់គេ ហើយបើតាមការគិតរបស់លោក Mancini ដែលធ្លាប់ធ្វើការជាមួយជម្រើសជាតិស៊ុយអែតរូបនេះ២ឆ្នាំនៅ Inter Milan ជឿជាក់ថា Ibrahimovic គឺជាខ្សែប្រយុទ្ធដ៏ល្អមួយរូបនៅក្នុងការប្រកួត។
ថ្លែងប្រាប់ Sport Mediaset បុរសសញ្ជាតិអ៊ីតាលីបានឲ្យដឹងយ៉ាងដូច្នេះថា៖
Zlatan នឹងក្លាយជាខ្សែប្រយុទ្ធមួយរូបដែលយើងនឹងចងចាំគ្រប់ពេលវេលា។ ខ្ញុំសូមដាក់គេឲ្យស្មើកម្រិតជាមួយ Messi និង Ronaldo។ គេបានឈ្នះពាននៅកន្លែងដែលគេបានលេង ហើយរកគ្រាប់បាល់បានច្រើនជាង ១ពាន់គ្រាប់។ ហើយគេក៏ធ្វើល្អជាមួយ (AC) Milan ដែរនៅរដូវកាលនេះ។
គួរឲ្យដឹងដែរថា Zlatan Ibrahimovic ដែលកំពុងលេងនៅ AC Milan ធ្លាប់ឈ្នះពានសរុប៣៣ ក្នុងអាជីពរបស់គេ ក្នុងនោះមានពានលីគកំពូល១៣ ពី៤ប្រទេសផ្សេងគ្នា៕
