កីឡាករពីររូបរបស់ម៉េនឆេស្ទ័រ យូណាយធីតគឺ ប្រ៊ូណូ ហ្វឺណានដេស (Bruno Fernandes) និង ផូល ប៉ុកបា (Paul Pogba) បានបង្ហាញចេតនាចង់ឈ្នះ ចាប់តាំងពីវិលត្រឡប់មកកាន់ការហ្វឹក ហាត់វិញ នេះបើតាមការអះអាងរបស់កីឡាករ លូក ស (Luke Shaw) ។
ខ្សែបម្រើសញ្ជាតិព័រទុយហ្គាល់ ហ្វឺណានដេស និង ប៉ុកបា ដែលយូណាយធីតផ្ទេរក្នុងតម្លៃខ្ពស់ ជាងគេនោះបានបង្ហាញមហិច្ឆតាខ្ពស់ក្នុងការនាំយកជ័យជម្នះជូនក្រុម។
ហ្វឺណានដេស បានមកជាន់ទីលាន ចាប់ផ្តើមពីត្រឡប់មកវិញកាលពីខែមករា ដោយកីឡាករ រូបនេះបានបង្ហាញឥរិយាបថថ្មី។ ផ្ទុយទៅវិញ ប៉ុកបា រង ការរិះគន់ដោយសារតែឥរិយាបថ នៅរដូវកាលនេះ។
ប៉ុន្តែខណៈពេលក្លឹបនៅក្របខណ្ឌព្រីមីញ៉េលីកចាប់ផ្តើមត្រៀមខ្លួនសម្រាប់ការបន្តរដូវកាល លូក ស បានរំលេចពីសកម្មភាពរបស់ខ្សែបម្រើទាំងនៅពេលហ្វឹកហាត់។
លូក បាននិយាយថា “កាលពីថ្ងៃអង្គារ យើងឃើញក្រុមកីឡាករមាន ផូល ប្រ៊ូណូ អែនជេល និង ណេម៉ានចា ហើយកីឡាករទាំងបួននេះមើលទៅដូចជារឹងមាំមែនទែន។ មានការប្រកួតច្រើន និងការស្រែក។ វាច្បាស់ណាស់ថា គ្រប់គ្នាមានបំណងចង់ឈ្នះការប្រកួតសូម្បីនៅក្នុងពេល ហ្វឹកហាត់។ យើងខកខានការប្រកួតនេះ”។
ហ្វឺណានដេស រកបាន៣គ្រាប់សម្រាប់យូណាយធីតចាប់តាំងពីចូលរួមនិងមានឥទ្ធិពលខ្លាំង។ អ្នកខ្លះជឿថា គុណភាពរបស់ ប៉ុកបា អាចនឹងធ្វើឲ្យក្លិបយូណាយធីតពិបាកសម្រេចចិត្តក្នុងការ លក់ចេញ។
លោក អូឡេ ហ្គាន់ណា សូលស្យែរ (Ole Gunnar Solskjaer) ដែលតែងតែការពារកីឡាករបារាំង រូបនេះគឺពេញចិត្តនឹងដាក់ឲ្យកីឡាករទាំងពីរលេងជាដៃគូនិងគ្នា៕
