ក្រុម FC Barcelona កំពុងប្រកាសដាក់លក់ខ្សែប្រយុទ្ធរបស់ខ្លួន Ousmane Dembele និង Coutinho ចេញនៅរដូវក្ដៅខាងមុខនេះ ដើម្បីមានកន្លែងសម្រាប់កីឡាករចំណូលថ្មី។
Dembele ជាកីឡាករដែលក្រុមអ្នកមានបុណ្យទិញមកដើម្បីជំនួសតំណែងរបស់ Neymar ប៉ុន្តែលទ្ធផលវិញមិនដូចចិត្តឡើយ។ កីឡាករបារាំងនេះតែងតែមានបញ្ហារបួសជាប់រហូត មិនមានឱកាសបានចូលលេងឱ្យពេញលេញនោះទេ។ កត្តានេះហើយ ទើបបានជាក្រុមអ្នកមានបុណ្យយល់ឃើញថាគួរតែដល់ពេលដើម្បីលក់រូបគេចេញ ទិញកីឡាករថ្មីចូលហើយ។
ដោយឡែកសម្រាប់ Coutinho វិញ ក្រុម Barcelona ទិញពីក្រុម Liverpool មកជាង១០០លានផោនដែរ ប៉ុន្តែក៏លេងមិនល្អដូចគ្នា។ រូបគេរដូវកាលនេះត្រូវបានក្រុម Bayern Munich ខ្ចីជើង ប៉ុន្តែការទៅលេងនៅអាល្លឺម៉ង់នោះក៏មិនទាន់ឃើញថាលេងល្អដូចកាលលេងឱ្យហង្សក្រហមដែរ។ ក្រុមរបស់លោក Setien បានដាក់កីឡាករប្រេស៊ីលនេះលក់ដូចគ្នានៅរដូវក្ដៅខាងមុខ។
ចំពោះតម្លៃខ្លួនកីឡាករលំដាប់ៗទាំងពីរនាក់ខាងលើនេះ ត្រូវបានក្រុម Barcelona បង្ហើបថាមិនថ្លៃខ្លាំងនោះទេ។ ឱ្យតែមានក្លឹបចង់បាន និងទាក់ទងមក ពួកគេនឹងស្ដាប់ពីសំណើរនោះមិនខាន៕
