ក្លិប Barcelona ត្រូវបានគេរាយការណ៍មកថាកំពុងតែព្យាយាមទាក់ទងនាំយកគ្រូបង្វឹកឆ្នើមរបស់ខ្លួនមកវិញគឺលោកគ្រូ Pep Guardiola ហើយប្រសិនបើក្លិប Manchester City ត្រូវបាន UEFA ពិន័យមិនឲ្យចូលលេងក្នុងពានរង្វាន់ Champions League ចំនួន២រដូវកាលមែននោះ ក្លិប Barca នឹងមានសង្ឃឹមកាន់តែច្រើនក្នុងការជួបជុំជាមួយលោក Pep សាជាថ្មីម្ដងទៀត។
គួររម្លឹកដែរថាលោក Pep Guardiola បានផ្លាស់ពីក្លិប Bayern Munich មកដឹកនាំក្លិប Man City នៅឆ្នាំ២០១៦ ជំនួសលោក Manuel Pellegrini ក្នុងនោះដែរកិច្ចសន្យាជាទឹកប្រាក់ចំនួន២០លានផោន (ឬប្រមាណ២៥លានដុល្លារ) របស់លោកជាមួយក្លិបនោះនឹងត្រូវបញ្ចប់នៅរដូវកាលក្រោយនេះ។
ក្លិបជើងឯក Premier League រដូវកាលមុន Man City ដែលថ្មីៗនេះទើបបាត់បង់ពានរបស់ខ្លួនទៅឲ្យក្លិប Liverpool នោះ នឹងត្រូវចាំរហូតដល់ចប់រដូវកាលនេះដើម្បីចរចាជាមួយលោក Pep ក្នុងការបន្តកិច្ចសន្យាថ្មី។
យ៉ាងណាមិញ បើទោះបីជាក្លិប Barcelona ទើបតែយកនាំយកលោក Quique Setien មកដឹកនាំកាលពីដើមឆ្នាំនេះក្ដី ក៏ក្លិបយក្សមួយនេះមិនស្ទាក់ស្ទើរក្នុងការបើកទ្វារង់ចាំលោក Pep Guardiola មករួមជាមួយក្លិបវិញនោះទេ។
ជាក់ស្តែង ក្រោយពេលដែលលោក Pep ចែកផ្លូវគ្នាជាមួយ Barca ក្លិបយក្សតំបន់កាតាឡាន់ មួយនេះឈ្នះពាន Champions League បានតែមួយដងប៉ុណ្ណោះគឺនៅឆ្នាំ២០១៥ ដោយឡែកនៅក្នុងកំឡុងពេលដែលលោកដឹកនាំចំនួន៤រដូវកាល ក្លិបមួយនេះឈ្នះពានសរុបរហូតដល់ទៅ១៤គ្រឿងឯណោះ៕
