ក្លិបមួយទៀតនៅក្របខ័ណ្ឌ Premier League គឺ Watford បានឈានដល់កិច្ចព្រមព្រៀងជាមួយអ្នកចាំទី Ben Foster ហើយ ក្នុងការពន្យារកុងត្រាបន្ថែម ២ ឆ្នាំទៀត ដែលនេះមានន័យថា អតីតអ្នកឈរយាមបង្គោលទីឲ្យក្រុមជម្រើសជាតិអង់គ្លេសរូបនេះ នឹងមិនទាន់ចាកចេញទៅណាឡើយ គិតតាំងពីបានមកកាន់ទឹកដី Vicarage Road ក្នុងឆ្នាំ ២០១៨។
កីឡាករវ័យ ៣៧ ឆ្នាំ ជិតនឹងក្លាយជាកីឡាករគ្មានកិច្ចសន្យាទៅហើយនៅចុងខែនេះ តែឥឡូវហ្នឹងរូបគេនឹងនៅតែចំណែកមួយក្នុងការជួយក្រុម Watford ដើម្បីតស៊ូឲ្យមានជីវិតរស់រាននៅក្របខ័ណ្ឌកំពូលរបស់អង់គ្លេសបន្តទៀត ពេលពួកគេចាប់ផ្ដើមយុទ្ធនាការដំបូងរបស់ខ្លួនឡើងវិញ ដោយការប្រឈមជាមួយក្រុម Leicester City នាថ្ងៃទី ២០ ខែមិថុនា នេះ។
កីឡាករ Foster ដែលបានបង្ហាញខ្លួនសរុបជិត ១៥០ ដង ជាមួយក្រុម Watford បានចាប់ផ្ដើមជាមួយការប្រកួតក្នុងលីកសម្រាប់ក្លិប ២៩ លើក រដូវកាលនេះ ដោយធ្វើបានកំណត់ត្រាសង្គ្រោះបាល់ចំនួន ៨៩ ដង និងមិនឲ្យរបូតគ្រាប់បាល់ចំនួន ៩ ការប្រកួត។
បច្ចុប្បន្នក្រុមដែលមានលោក Nigel Pearson ជាគ្រូបង្វឹកកំពុងនៅពីលើក្រុមដែលត្រូវកាត់ចោល Bournemouth ដោយចំនួនគ្រាប់បាល់ប៉ុណ្ណោះ ព្រោះមាន ២៧ ពិន្ទុស្មើគ្នា ខណៈការប្រកួតនៅសល់ ៩ សហប្ដាហ៍ទៀត នឹងបញ្ចប់ជាស្ថាពរហើយ។
ក្រោយព្រមបន្តកិច្ចសន្យានេះ កីឡាករ Foster បានប្រាប់ឲ្យដឹងតាមរយៈវេបសាយរបស់ក្រុមថា៖ «ពួកយើងត្រូវតែចាប់ផ្ដើមធ្វើអ្វីៗឲ្យលឿនបំផុត ដែលអាចឲ្យយើងទទួលបានលទ្ធផលល្អ ហើយខ្ញុំជឿយ៉ាងមុតមាំថា យើងអាចឡើងទៅដល់ពាក់កណ្ដាលតារាង ប្រសិនបើយើងអាចប្រកួតឈ្នះ ៣ ដង លឿនបំផុត។ បើធ្វើបានភ្លាមៗ យើងនឹងឡើងពីលេខ ១៧ ទៅដល់ពាក់កណ្ដាលតារាង ដោយសារមានពី ៦ ទៅ ៧ ក្រុម ដែលមានពិន្ទុកៀកៗគ្នា។ ដូច្នេះ សំខាន់ណាស់ ដែលយើងត្រូវចាប់ផ្ដើមឲ្យបានល្អ»៕
