ការស៊ុតទម្លុះសំណាញ់ទីពីសំណាក់ខ្សែបម្រើ Leon Goretzka នៅនាទីទី ៨៦ វាបានក្លាយជាគ្រាប់បាល់ដ៏សំខាន់ ដែលជួយឲ្យក្រុមម្ចាស់ផ្ទះ Bayern Munich ឈ្នះក្រុម Moenchengladbach (MG) ក្នុងលទ្ធផលប្រកៀកប្រកិត ២-១ ក្នុងការប្រកួតកាលពីថ្ងៃសៅរ៍ ហើយជ័យជម្នះនេះបង្ហាញឲ្យឃើញថា ក្រុមជើងឯកចាស់ ១ នេះ ត្រូវការតែ ៣ ពិន្ទុទៀតប៉ុណ្ណោះ ដើម្បីធានាបានថា ពួកគេគឺជាម្ចាស់ពានរង្វាន់ក្របខ័ណ្ឌ Bundesliga រដូវកាល ២០១៩-២០២០។
គ្រាប់បាល់របស់ Goretzka នេះ មិនត្រឹមតែនាំជ័យជម្នះឲ្យក្រុម Bayern ប៉ុណ្ណោះទេ ប៉ុន្តែថែមទាំងបានជួយស្ដារមុខមាត់ឲ្យមិត្តរួមក្រុម Benjamin Pavard ដែលភ្លាត់ស្នៀតធ្វើឲ្យបាល់ចូលទីខ្លួនឯងនៅនាទីទី ៣៧ ផ្ដល់ឱកាសឲ្យក្រុមភ្ញៀវតាមស្មើគ្រាប់បាល់នាំមុខរបស់កីឡាករ Joshua Zirkzee ហើយអ្វីដែលសំខាន់នោះ គឺនាំមុខ ៧ ពិន្ទុដាច់លើក្រុមលេខ ២ Dortmund ដែលប្រកួតឈ្នះ Fortuna Duesseldorf ១-០ដែរ នៅទឹកដីខ្លួនឯង។
សម្រាប់ការប្រកួតដែលគ្មានទស្សនិកជនចូលរួមនេះ ក្រុម Moenchengladbach បើទោះជាលេងក្រៅផ្ទះក៏ដោយ ក៏បានប្រឹងប្រែងទម្លុះខ្សែការពាររបស់ក្រុមម្ចាស់ផ្ទះជាច្រើនលើកច្រើនសាដែរ រហូតបានបំប៉ោងសំណាញ់ទីមុននៅនាទីទី ១៦ ដោយ Jonas Hofmann តែគួរឲ្យស្ដាយជាគ្រាប់បាល់ជំហរក្រៅល្បែង (offside)។
ក្រោយក្រុមគូប្រជែងត្រូវបានបដិសេធគ្រាប់បាល់ ក្រុម Bayern ចាប់ផ្ដើមវាយបកវិញម្ដង ហើយក៏បានគ្រាប់បាល់នាំមុខនៅនាទីទី ២៦ ដោយសារកីឡាករ Zirkzee មិនខ្ជះខ្ជាយឱកាសពេលបានបាល់របស់អ្នកចាំទី Yann Sommer ដែលបញ្ជូនភ្លាត់ទៅចំខ្លួន។ តែ ១១ នាទីក្រោយមក កីឡាករ Pavard ក៏បានផ្ដល់កាដូឲ្យ Moenchengladbach វិញ ដោយការធ្វើឲ្យចូលទីខ្លួនឯង ពេលព្យាយាមស្កាត់បាល់របស់ Patrick Herrmann ធ្វើឲ្យក្រុមទាំង ២ ស្មើគ្នា ១-១។
ឈានចូលតង់ទី២ ទាំងក្រុមម្ចាស់ផ្ទះ និងភ្ញៀវ ធ្វើការសម្រុកគ្នាទៅវិញទៅមក ដើម្បីដណ្ដើមជ័យជម្នះរៀងៗខ្លួន ដោយក្រុម Bayern ត្រូវការពិន្ទុ ដើម្បីកៀកនឹងការឈ្នះពាន ១០ រដូវកាលជាប់ៗគ្នា ខណៈ Moenchengladbach ត្រូវការកៅអីទៅលេងក្របខ័ណ្ឌអឺរ៉ុប Champions League ហើយការប្រកួតនៅកីឡដ្ឋាន Allianz Arena នេះ គ្រប់គ្នាគិតថា ក្រុមទាំង ២ នឹងចែកគ្នាម្នាក់ ១ ពិន្ទុ ព្រោះនៅសល់តែ ៤ នាទីទៀតប៉ុណ្ណោះ នឹងបញ្ចប់ការប្រកួតផ្លូវការទៅហើយ តែ Goretzka ស៊ុតបញ្ចូលទីយ៉ាងល្អឥតខ្ចោះ ដែលជាគ្រាប់បាល់ដ៏សំខាន់ សម្រាប់ការប្រកួតសប្ដាហ៍ទី ៣១ នេះ។
ប្រធានក្រុម Bayern គឺអ្នកចាំទី Manuel Neuer និយាយថា៖ «យើងអាចឈ្នះក្នុងការប្រកួតដ៏តានតាំងនេះ។ ផែនការរបស់យើង ដូចជាប្លែកបន្តិច។ យើងមិនបានគ្រប់គ្រងបាល់ច្រើន និងគាបសង្កត់នៅតំបន់កណ្ដាលឲ្យខ្លាំងឡើយ។ យើងបណ្ដោយឲ្យពួកគេវាយសម្រុកមកលើយើង។ នោះជាការរៀបចំរបស់យើង»៕
