ក្រុម Liverpool បានយកឈ្នះលើក្រុម Chelsea ក្នុងលទ្ធផល ៥-៣ ក្នុងការប្រកួតលីគកំពូលអង់គ្លេស សប្ដាហ៍ទី៣៧ ហើយនេះក៏ជាការប្រកួតដែលហង្សក្រហមអបអរលើកពានផងដែរ។
សម្រាប់ការប្រកួតនោះដែរ គេសង្កេតឃើញថានៅពេលកីឡាករ Liverpool រកគ្រាប់បាល់បាន១គ្រាប់ៗ ទាំងអ្នកនៅអង្គុយកៅអីបម្រុង និងអ្នកលើទីលានហាក់ដូចជាអបអរខ្លាំង ឌឺដងដល់ក្រុមរបស់លោក Lampard មែនទែន។ ចំពោះរឿងកាយវិការនេះហើយ បានធ្វើឱ្យអ្នកចាត់ការវ័យក្មេងរបស់តោខៀវ ហាក់ដូចជាមិនពេញចិត្តនោះទេ ដោយលោកអះអាងថាបានលើកពានហើយ សប្បាយចិត្តចុះ ប៉ុន្តែកុំក្រអឺតក្រទមពេក។
រំលឹកថាក្រុម Liverpool ឈ្នះលីគនេះ គឺជាលើកដំបូងសម្រាប់ពួកគេ ក្នុងរយៈពេល៣០ឆ្នាំចុងក្រោយមកនេះ។ មួយវិញទៀត សម្រាប់ការឈ្នះនៅយប់មិញ គឺបានធ្វើឱ្យក្រុម Chelsea ធ្លាក់ចេញពីតំណែងលេខ៣ក្នុងតារាងផងដែរ ដោយ Man Utd ជាអ្នកឡើងមកជំនួស។ កត្ដានេះហើយ ទើបបានជាប្រកួតចុងក្រោយ Chelsea ត្រូវប្រឹងប្រែងឱ្យខ្លាំង ដើម្បីឱ្យបានកៅអី UEFA Champions League ៕
