ខ្សែប្រយុទ្ធអន្តរជាតិអាហ្សង់ទីន Lautaro Martinez ចាប់ផ្ដើមទទួលបានការអារម្មណ៍ខ្លាំង ក្រោយមានចំណែកស៊ុតញ្ចូលទី ១ គ្រាប់ ពេលក្រុមពស់ធំ Inter Milan បានយកឈ្នះក្រុម Sampdoria ២-១ អំឡុងការប្រកួតនៅឯកីឡដ្ឋាន San Siro ដែលធ្វើឲ្យមានឱកាសខ្ពស់គួរសម ក្នុងការប្រជែងពានក្របខ័ណ្ឌ Serie A រដូវកាលនេះ។
ក្រោយការប្រកួតប្រជែង បានត្រឡប់មកមានសកម្មភាពវិញ បន្ទាប់ពីផ្អាកដោយសារតែការផ្ទុះឡើងនូវវីរុសកូរ៉ូណា ក្រុម Inter ក្នុងនាមជាម្ចាស់ផ្ទះ ចាប់ផ្ដើមការប្រកួតដំបូងរបស់ខ្លួនវិញនៅលីកកំពូលនេះ ជាមួយនឹងទម្រង់លេងយ៉ាងល្អ ព្រោះការប្រកួតដំណើរការទៅត្រឹមតែ ១០ នាទីប៉ុណ្ណោះ ខ្សែប្រយុទ្ធសញ្ជាតិបែលហ្ស៊ិក Romelu Lukaku ក៏មានឱកាសស៊ុតបញ្ចូលទីឲ្យក្រុមខ្លួននាំមុខ ១-០ បាត់ទៅហើយ ក្រោយពីបញ្ចូនបាល់ឲ្យគ្នាទៅវិញទៅមកបានយ៉ាងល្អ (one-two) ជាមួយនឹងខ្សែបម្រើ Christian Eriksen របស់ដាណឺម៉ាក។
បន្ទាប់មក ក្រុមរបស់លោក Antonio Conte នៅតែមានប្រៀបជាងក្រុមភ្ញៀវដដែល ហើយសល់ ១២ នាទី មុនចប់ការប្រកួតវគ្គទី ១ កីឡាករ Martinez ដែលកំពុងស្ថិតក្នុងរ៉ាដារបស់ក្រុមអ្នកមានបុណ្យ Barcelona នៅអេស្ប៉ាញ ក៏បន្ថែមគ្រាប់នាំមុខ ១ គ្រាប់ទៀត ដែលនេះក៏ជាគ្រាប់ដំបូងរបស់កីឡាករវ័យ ២២ ឆ្នាំផងដែរ គិតតាំងពីខែមករាមក។
ចូលដល់វគ្គទី ២ ខ្សែបម្រើ Morten Thorsby ជួយឲ្យក្រុម Sampdoria មានទឹកមាត់លេបឡើងវិញ បន្ទាប់ពីមានឱកាសធ្វើបានសម្រេច ១ គ្រាប់ នៅនាទីទី ៥២ បន្ថយការនាំមុខមកត្រឹម ១ គ្រាប់។ បន្ទាប់ពីនោះ ក្រុមទាំង ២ មិនអាចទម្លុះសំណាញ់ទីគ្នាបានឡើយ ធ្វើឲ្យលទ្ធផលផ្លូវការ ក្រុម Inter Milan ឈ្នះ Sampdoria ២-១។
ជ័យជម្នះនេះ មិនត្រឹមតែជួយឲ្យក្រុម Inter បានរំកិលទៅកៀកនឹងក្រុមកំពូលតារាង Juventus ដោយតាមពីក្រោយ ៦ ពិន្ទុប៉ុណ្ណោះទេ ថែមទាំងបានស្ដារមុខមាត់របស់ខ្លួនផងដែរពីការបរាជ័យ ក្រោមថ្វីជើងក្រុម Napoli កាលពីសប្ដាហ៍មុន រហូតធ្លាក់ចេញពីពានរង្វាន់ Coppa Italia ក្នុងវគ្គពាក់កណ្ដាលផ្ដាច់ព្រ័ត។
ត្រឹមសប្ដាហ៍ទី ២៦ នេះ ក្នុងតារាងពិន្ទុនៃក្របខ័ណ្ឌ Serie A អ៊ីតាលី ក្រុមនៅទីកំពូលទាំង ៤ មានក្រុម Juventus ឈរនៅលេខ ១ មាន ៦៣ ពិន្ទុ, លេខ ២ ក្រុម Lazio មាន ៦២ ពិន្ទុ, លេខ ៣ ក្រុម Inter មាន ៥៧ ពិន្ទុ និងលេខ ៤ ក្រុម Atalanta មាន ៥១ ពិន្ទុ។ ចំណែកក្រុមនៅបាតតារាង គឺក្រុម Lecce ២៥ ពិន្ទុ, ក្រុម SPAL ១៨ ពិន្ទុ និងក្រុម Brescia ១៦ ពិន្ទុ៕
