ដោយខកខានអស់រយៈពេល៣រដូវកាលមកហើយនោះ ក្លិបអធិរាជស Real Madrid បានសម្រេចជោគជ័យគ្រោងជើងឯកលីគកំពូល La Liga របស់ពួកគេនៅរដូវកាលនេះ ក្រោយយកឈ្នះក្លិប Villarreal កាល ពីយប់មិញ។ ដោយឡែក បន្ទាប់ពីប្រកួតចាញ់ក្លិប Osasuna យប់មិញដែរនោះ ប្រធានក្រុមរបស់ Barcelona គឺកីឡាករ Lionel Messi បានផ្តល់បទសម្ភាសន៍លើការឈ្នះពានរបស់ Real Madrid នេះដែរថា៖
ពួកយើងមិនបានរំពឹងទុកថានឹងត្រូវបញ្ចប់រដូវកាលដោយលទ្ធផលបែបនេះនោះទេ ប៉ុន្តែជាក់ស្តែងវាជាអ្វីដែលយើងទទួលបាននៅរដូវកាលនេះ។ ក្រុមរបស់ពួកយើងនៅខ្សោយណាស់ បង្កើតកំហុសច្រើន និងគ្មានការប្តេជ្ញាខ្ពស់នៅក្នុងការប្រកួតនីមួយៗ។ ពួកយើងធ្វើឲ្យបាត់បង់ពិន្ទុជាច្រើនប្រកួត ហើយការប្រកួតថ្ងៃនេះវាសបញ្ជាក់ពីទម្រង់លេងរបស់យើងនៅរដូវកាលនេះតែម្តង។ យើងគួរតែទទួលស្គាល់ចំណុចខ្សោយរបស់យើងទាំងនេះ ហើយចាប់ផ្តើមពីកីឡាកររហូតដល់ថ្នាក់ដឹកនាំក្លិបទាំងមូល ដើម្បីកែស្ថានការណ៍នេះឲ្យប្រសើរឡើងវិញ។ ក្លិបរបស់យើងបាន ជួយ Real Madrid ច្រើនណាស់ឲ្យតាមពីក្រោយរហូតដល់ឆក់ពានមួយនេះទៅបាត់។ យ៉ាងណាមិញ បើសិនជាចង់ឈ្នះពាន Champions League នៅរដូវកាលនេះលុះត្រាតែក្លិបរបស់យើងធ្វើការផ្លាស់ប្តូរឲ្យច្រើនជាងនេះ បើនៅតែដូច្នេះយើងនឹងចាញ់ការប្រកួតជាមួយក្លិប Napoli នៅខែក្រោយជាក់ជាមិនខាន៕
