Real Madrid ត្រូវបានរាយការណ៍មកថា ចាប់អារម្មណ៍មកលើខ្សែប្រយុទ្ធរបស់ Borussia Dortmund កីឡាករ Julian Brandt និងចង់នាំយកមកកាន់កីឡដ្ឋាន Santiago Bernabeu នៅទីផ្សាររដូវក្ដៅលើកនេះ។
កីឡាករវ័យ២៤ឆ្នាំ បានផ្លាស់ពី Bayer Leverkusen មកចូលរួមជាមួយ Dortmund កាលពីរដូវកាលឆ្នាំមុន និងបានបង្ហាញទម្រង់លេងគួរឲ្យកត់សម្គាល់។ ជាក់ស្ដែង នៅរដូវកាលនេះ គេរកបានគ្រាប់បាល់៧គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច៨លើក ពីការចូលលេង៣៣ប្រកួតគិតគ្រប់ព្រឹត្តិការណ៍ទាំងអស់។
បើតាមប្រភពព័ត៌មានពីក្នុងប្រទេសអេស្ប៉ាញ Real Madrid មានគំនិតចង់នាំយកជម្រើសជាតិអាល្លឺម៉ង់ទៅរួមក្រុមនៅរដូវកាល ២០២០-២១ ខាងមុខ ដោយអ្នកចាត់ការទូទៅចង់បង្កើនគុណភាពនៅតំបន់ប្រយុទ្ធរបស់ក្រុម ឲ្យកាន់តែខ្លាំង។
គួរឲ្យដឹងដែរថា Julian Brandt អាចលេងបានច្រើនតួនាទីនៅទីលាន ក្នុងនោះក្រៅពីតំបន់ប្រយុទ្ធពេញតួរ គេក៏អាចលេងក្នុងតំណែងជាខ្សែប្រយុទ្ធស្លាប និងខ្សែបម្រើប្រយុទ្ធផងដែរ៕
