បន្ទាប់ពីការប្រកួតចប់ជាមួយក្លិប Genoa កាលពីយប់មិញ អ្នកចាត់ការទូទៅក្លិប Juventus លោក Maurizio Sarri បានធ្វើការកោតសរសើរយ៉ាងខ្លាំងដល់ទម្រង់លេងរបស់កីឡាករ Dybala និង Ronaldo ដោយថាពួកគេទាំងពីអ្នកកំពុងតែលេងត្រូវជើងគ្នាខ្លាំងណាស់នៅប៉ុន្មានប្រកួតចុងក្រោយនេះ។
នៅក្នុងការប្រកួតយប់មិញដែរ ខ្សែប្រយុទ្ធ Ronaldo និង Dybala រកបានម្នាក់មួយគ្រាប់ តាមរយៈការស៊ុតបាល់ដោយប្រើបច្ចេកទេសដ៏ល្អឥតខ្ចោះរបស់ពួកគេរៀងៗខ្លួន ហើយបានជួយឲ្យ Juventus វ៉ាដាច់ Lazio ចំនួន៤ពិន្ទុឈរលើកំពូលតារាង Serie A ។
មានការមើលឃើញជាច្រើនថា ការចាប់ដៃគូគ្នារវាងកីឡាករ Dybala និង Ronaldo នៅមានកម្រិតនៅឡើយក្នុងតំបន់ប្រយុទ្ធរបស់ Juventus កាលពីរដូវកាលមុន។ ប៉ុន្តែនៅប៉ុន្មានប្រកួតចុងក្រោយ តារាឆ្នើមទាំង២នេះបានធ្វើឲ្យអ្នកគាំទ្រកាន់តែទុកចិត្តលើគុណភាពនៃការលេងជាមួយគ្នារបស់ពួកគេ។
ខ្ញុំឃើញថាមានការផ្លាស់ប្តូរជាច្រើននៃការលេងរួមគ្នារវាង Ronaldo និង Dybala ដោយពួកគេទាំង២នាក់លេងត្រូវជើងគ្នាល្អណាស់នៅប៉ុន្មានប្រកួតចុងក្រោយនេះ។ ពួកគេចាប់ផ្តើមមានគំនិតថាការជួយគាំទ្រគ្នាទៅវិញទៅមកនៅក្នុងការប្រកួតវានឹងធ្វើឲ្យពួកគេប្រសើឡើងទាំងសងខាង ហើយនៅក្នុងពេលហ្វឹកហាត់ក៏ឃើញពួកគេចាប់ផ្តើមធ្វើបែបហ្នឹងដូចគ្នា។ ជាការពិតក្រោយពីមានការខកចិត្តយ៉ាងខ្លាំងនៅពាន Copa Italia ក្រុមរបស់យើងទាំងមូលកំពុងតែមានទម្រង់លេងកាន់តែល្អឡើងវិញហើយ៕
