ក្រុមដែលហាក់ដូចជាខ្សោះកម្លាំង Manchester United បានត្រឹមស្មើ ១-១ នៅផ្ទះខ្លួនឯង ជាមួយក្រុម West Ham United កាលពីថ្ងៃពុធ ដែលលទ្ធផលនេះ ធ្វើឲ្យពួកគេមិនត្រូវចាញ់ដាច់ខាត ពេលប្រកួតបិទរដូវកាលក្របខ័ណ្ឌ Premier League ទល់នឹងក្រុម Leicester City បើចង់ធានានូវកៅអី ១ សម្រាប់បានទៅលេងនៅ Champions League។
សម្រាប់ក្រុម West Ham ពិន្ទុនេះ សំខាន់ណាស់ ព្រោះគ្រប់គ្រាន់សម្រាប់ជួយឲ្យពួកគេរួចផុតពីកាត់ទៅលីកទី២ ដោយមិនបាច់ខ្វល់ពីលទ្ធផលនៃការប្រកួតចុងក្រោយ ព្រោះពេលនេះ បានឡើងទៅដល់លំដាប់ទី១៥ ជាមួយនឹង ៣៨ ពិន្ទុ ដោយនាំមុខដាច់ ៤ ពិន្ទុ លើក្រុមលេខ ១៨ Watford។
តែលទ្ធផលនេះបង្ហាញថា ក្រុមដែលត្រូវប្រកួតប្រជែងយកចំណាត់ថ្នាក់ ដើម្បីបានលេងក្របខ័ណ្ឌកំពូលរបស់អឺរ៉ុប ត្រូវរង់ចាំសម្រេចចុងក្រោយនៅសប្ដាហ៍ទី ៣៨ ព្រោះពេលនេះ គ្មានក្រុមណាមានពិន្ទុដាច់ឡើយ ដោយក្រុម Man United ឈរនៅទី៣ មាន ៦៣ ពិន្ទុ ស្មើក្រុមលេខ ៤ Chelsea តែសល់គ្រាប់បាល់ស៊ុតបញ្ចូលទីច្រើនជាង ខណៈក្រុមលេខ ៥ Leicester កំពុងតាមពីក្រោយ ១ ពិន្ទុ។
ក្រោយខកចិត្តដោយសារធ្លាក់ពីកម្មវិធី FA Cup ត្រឹមវគ្គ ១/២ ព្រោះចាញ់ Chelsea ៣-១ នៅកីឡដ្ឋាន Wembley កាលពីថ្ងៃអាទិត្យ លោក Solskjaer សង្ឃឹមថា នឹងទទួលបានការឆ្លើយតបវិជ្ជមានពីកូនក្រុម តែផ្ទុយស្រឡះ មើលទៅហាក់ដូចជាបាត់បង់ថាមពល និងគ្មានសម្ទុះទាល់តែសោះ។
សម្រាប់ការប្រកួត ដែលជាឱកាសធានានូវចំណាត់ថ្នាក់ ក្នុងក្រុមនៅទីកំពូលទាំង ៤ របស់ក្រុមម្ចាស់ផ្ទះ ប្រសិនបើឈ្នះ តែការងារធ្ងន់កំពុងរង់ចាំ ក្រោយក្រុម West Ham របស់លោក David Moyes ទទួលបានបាល់ពិន័យ ១១ ម៉ែត្រ នៅនាទីទី៤៥+២ ដោយសារបាល់ប៉ះដៃកីឡាករ Paul Pogba ដែលលើករងមុខខ្លួនឯង ខណៈកីឡាករ Michail Antonio ក៏មិនខ្ជះខ្ជាយឱកាសនេះ ដោយការស៊ុតបំប៉ោងសំណាញ់ទីបានយ៉ាងល្អ ជួយឲ្យក្រុមខ្លួន នាំមុខបណ្ដោះអាសន្ន ១-០ ពេលចប់វគ្គទី១។
ក្រោយត្រឡប់ពីសម្រាក ១៥ នាទី ក្រុមបិសាចក្រហម ចាប់ផ្ដើមសម្រុករកគ្រាប់បាល់តាមស្មើ ហើយជាថ្មីម្ដងទៀត កីឡាករដ៏មានទេពកោសល្យ Mason Greenwood វ័យទើប ១៨ ឆ្នាំ បានជួយឲ្យក្រុមចាប់ផ្ដើមមានសង្ឃឹមឡើងវិញ ដោយការស៊ុតបាល់បញ្ចូលទី នៅនាទីទី៥១ ដែលនោះជាគ្រាប់បាល់ទី ១៧ របស់គេ គិតគ្រប់កម្មវិធីប្រកួតទាំងអស់។ តែក្រោយពីមានលទ្ធផលស្មើ ១-១ ក្រុមទាំង ២ មិនអាចធ្វើអ្វីគ្នាបានឡើយ រហូតដល់សំឡេងកញ្ចែចុងក្រោយបានបន្លឺឡើង។
គ្រូបង្វឹកសញ្ជាតិន័រវែស លោក Solskjaer និយាយថា៖ «នៅពេលយើងចាប់ផ្ដើមវិញ ក្រោយការបិទទ្ធារប្រទេស យើងប្រឹងប្រែង ដើម្បីជ័យជម្នះ។ យើងប្រឹងប្រែង ដើម្បីមានគ្រាប់បាល់ឲ្យបានច្រើន និងបានពិន្ទុរាល់ការប្រកួត។ ការប្រឹងប្រែងនោះ ពិតជាអស្ចារ្យណាស់ ហើយលទ្ធផលក៏អស្ចារ្យដែរ»។
ពាក់ព័ន្ធនឹងការប្រកួត អ្នកចាត់ការវ័យ ៤៧ ឆ្នាំ ប្រាប់ថា៖ «និយាយពីវគ្គទី១ យើងដឹងថា វាមិនមែនជាលទ្ធផល ដែលយើងចង់បាននោះទេ។ តែអ្នកមិនអាចរំពឹងផ្លាស់ប្ដូរក្រុម ដូចដែលយើងចង់ឲ្យមានទិដ្ឋភាពខុសប្លែក សម្រាប់ថ្ងៃអាទិត្យនោះឡើយ។ តែយ៉ាងណា យើងបានផ្ដល់ឲ្យក្រុមយើងនូវឱកាសដ៏អស្ចារ្យ និងភាពរឹងមាំសម្រាប់ការប្រកួតនាថ្ងៃអាទិត្យនេះ»៕
